E organisashon ‘Awor t’e Ora’ ta pidiendo pa tene un referèndem nobo pa ‘konsultá’ pueblo supuestamente over di e proseso estatal. Mester remarká ku e resolushon di dia 4 di mart 2008 di e ‘movementu’ aki no ta bisa kiko e referèndem lo ta supos di konsultá presis. Kiko ‘Awor t’e Ora’ kier tende di pueblo? Esei no ta kla.

Resolushon di 4 di mart 2008 di ‘Awor t’e Ora’ ta konkluí ku lo organisá un akshon di firma pa yega na 4 punto:

  1. un dialogo ‘nashonal’;
  2. un evaluashon dor di Nashonnan Uní di e proseso estatal;
  3. un siklo di informashon ophetivo;
  4. un referèndem konsultativo.

Un referèndem nobo over di kiko?

Si bo kier un referèndem nobo, bo mester splika over di kiko. Mirando ku ‘Awor t’e Ora’ ta hasi su petishon den kuadro di kehonan over di e proseso estatal, nos mester konkluí ku ‘Awor t’e Ora’ kier un referèndem nobo pa e pueblo bolbe bisa si nan kier ‘Laso Direkto’, òf ‘Pais Outónomo’.

Ban suponé ku nos ta bai tene otro referèndem awor, manera ‘Awor t’e Ora’ aparentemente kier. Kiko ta sosodé e ora ei, si pueblo ta opta pa ‘pais outónomo’? Nos ta bai traha 4 aña duru e ora ei pa implementá pais outónomo, anto algun luna promé ku ta keda kla ku esei nos ta bolbe bai tene otro referèndem? Asina nos ta bai sigui kada biaha? Esta, vota den referèndem, traha pa implementá eskoho di pueblo, anto promé ku ta keda kla tene otro referèndem pa wak si pueblo por a kambia di opinion? Esaki ta ridíkulo! Kiko ‘Awor t’e Ora’ ta bezig kuné? Di kon nan no por respetá desishon di pueblo?

Mas informashon no por remplasá eksperiensia propio

Ku mester duna mas informashon ta sierto, ounke dunamentu di informashon riba su mes no ta nifiká ku mayoria di pueblo lo bai komprondé tur e informashon imediatamente.

Por ehèmpel. Por duna informashon amplio over di struktura estatal di Hulanda na un hende ku tin deseo pa bai biba ayanan, pero tanten ku e persona ei no tin eksperiensia propio, e lo no sa kiko ta Hulanda. Tur hende ku a yega di biba na Hulanda por bisa bo esei. Asina ta ku e proseso estatal na Boneiru tambe: mas informashon ta importante, pero lo no duna nos pueblo un idea korekto i kompleto over di e struktura estatal nobo tanten ku pueblo no a haña eks-
periensia propio.

Pues pueblo mester biba e struktura estatal nobo algun aña pa haña sa kiko e ta realmente. Eksperiensia diario ku e struktura nobo lo siña e pueblo kiko e ta di berdat. Un referèndem konsultativo 5 aña despues di implementashon di e struktura nobo sí por tin sentido.  Pero otro referèndem awor ta un webu di gai ku dos kabes.

Tur esaki no ta kita ku gobièrnu en berdat tin un obligashon moral pa informá pueblo mas tantu posibel i riba e punto aki gobièrnu ta fayando.

Pero kiko ‘Awor t’e Ora’ kier realmente?

Segun nos ‘Awor t’e Ora’ ta buskando manera pa stanka i torpediá e proseso estatal. Tur dia nan ta sklama pa mas informashon, mientras nan mes ta duna anti-informashon. Pero kiko lo pasa si nan ta logra stòp e proseso estatal? Kiko Boneiru, Saba i Statia lo mester hasi e ora ei?

‘Awor t’e Ora’ kier pa nos bai Kòrsou bèk?

ARCO semper a bisa ku nos no tin nada kontra Kòrsou. Pa nos, henter e asuntu di ‘Laso Direkto’ no tabata kontra Kòrsou, sino pro Boneiru. Den nos historia komun Boneiru mester ‘wak pa su mes’ un ratu, pasobra no tabata faktibel mas pa tene e islanan di Antia huntu, ounke esei ta di lamentá sigur.

Que es mas, Antia (inkluso Aruba) por bin bèk huntu solamente via di Hulanda i despues ku nos mes a ‘spat é for di otro’, pasobra solamente esei lo duna nos e chèns di rekonstruyé ‘from the bottom up’. Ta lamentabel (i kostoso!) ku e mester bai asina, pero nos mes no tabatin e noblesa di karakter pa hasi’é di otro manera.

Kon ku bai bin, nos no por bai Kòrsou bèk

Hecho ta ku nos mes a kibra Antia. Nos no por lant’e bèk awor. Den futuru sí, ‘from the bottom up’, pero awor nò. Kòrsou tampoko no kier lanta Antia bèk awor. Ni St. Maarten. Úniko kos lógiko ku nos por hasi awor, pues, ta pa bai laman ku Hulanda, konforme opshon di Laso Direkto. 59.5% di votadónan Boneriano a opta pa esei. Ta p’esei ‘Awor t’e Ora’ tin ku stòp ku su intentonan pa kibra e aktual proseso estatal. Respetá desishon di pueblo! Yuda gobièrnu pa logra e mihó deal posibel ku Hulanda pa nos pueblo! Stòp di fulminá konstantemente kontra desishon di pueblo!

Kiko lo pasa si ta kibra e proseso estatal? 

Si ‘Awor t’e Ora’, apoyá pa Aliansa Demokrátiko, ta logra nan meta pa tene otro referèndem i si pueblo ta vota pa Pais Outónomo, kiko lo pasa e ora ei? Nos ekonomia lo sak den otro mes ora. Tur hende lo bandoná Boneiru atrobe, manera a pasa na añanan 1994 - 1998 despues di e ‘come-back’ di Jopi Abraham. Niun hende lo tin konfiansa den Boneiru mas. Hopi kompania lo sera nan porta. Hopi hende lo perdè trabou. Pa stòp e proseso awor ta un desaster di marka mayó.

Tags:

Comments

  • Be the first to comment, please use the form below.

Post A Comment





0.5583 // 49