Komo ARCO nos tin obligashon na nos lesadónan pa skirbi e bèrdat manera nos ta mir’é. ‘E bèrdat lo librá bo!’ Naturalmente ta posibel ku nos ta mir’é robes. Nos ta skirbi nos bèrdat. Anto niun hende no tin privilegio riba bèrdat. E rapòrt di Rekenkamer ku a kai manera un regalo for si shelu riba kaminda di Jopi Abraham, ta malu en bèrdat. Ta di spera ku gobièrnu di UPB por duna mas informashon na Rekenkamer ainda, di moda ku nan por modifiká nan rapòrt. Sin embargo, na e momentu aki ta parse ku fayonan serio a wòrdu kometé.

Korupshon no ta nada nobo
Pero realmente esaki no ta nada nobo. Korupshon ‘suave’, manera nos sa yamele, ta algu ku a sosodé tur ora den polítika Antiano i Boneriano. Tur partido polítiko ta i a kometé e tipo di erornan aki na granèl i konstantemente, tantu Demokrat komo UPB. I no ta di awe tampoko. Esaki a bira kustumber sigur for di añanan 1970 i probablemente promé ku esei. El a bira parti di nos kultura. Asta ta asina ku nos pueblo a kuminsá mirele komo algu normal. Pueblo no ta rel mas i hopi hende a envolví nan mes den dje, pensando: ‘If you can’t beat them, join them’.

Waarheidscommissie
Na aña 2002 pader Rudy Lampe a saka un ‘Waarheidsrapport’ tokante proyektonan ku gobièrnu di Aruba a entamá ku sèn di pueblo i sèn di Hulanda durante un periodo di mas òf ménos un 20 aña n’ei. A sali ku tantu gobièrnu di MEP komo esun di AVP tabata involví den mashá hopi baina. E rapòrt aki ta lesa manera un buki di avontura, kaminda e wega tabata konstantemente ta kon por saka mas tantu probecho personal posibel. Awor, esei ta Aruba. Pero Boneiru i Kòrsou no ta otro. Nos pueblo lo no bai dilanti tanten ku nos no ta dispuesto pa mira den spil pa analisá nos propio foutnan en bes di sigui kulpa otronan, vooral Hulanda, pa tur kos ku ta malu.

Nos mester bai pa Ramonsito tòg
Nos ta spera di kurason ku Ramonsito por sali for di e problema aki ainda ku su kara na haltu. Por ta ku Rekenkamer lo kambia su opinion alsnog, si UPB ta manda nan mas informashon. Ban spera. I ban spera ku niun hende ta pone preshon riba Rekenkamer pa kambia su rapòrt!

Sin embargo, asta si Rekenkamer no ta kambia su opinion i ta mantené su konklushonnan negativo, nos mester sostené Ramonsito tòg, pasobra ta netamente su maneho ku lo kaba ku korupshon efektivamente. Ta Ramonsito a bai di akuerdo pa Hulanda pone kòntròl fi nansiero i hudisial severo pa evitá e tipo di problemanan aki den futuro. Te na último ora Jopi a oponé kontra e laso direkto, ku lo bini ku kòntròl efektivo di parti di Hulanda pa frena korupshon.

Sin kòntròl di Hulanda korupshon lo sigui
Si Jopi kier kaba ku korupshon, e mester aploudí e kòntròl ku Hulanda kier pone. Pero e ta keda ketu ketu over di esei. E ta preferá di kulpa Ramonsito. Nos no tin niun ilushon over di Jopi i PDB su pasado. Nos no ta kere ku nan ta limpi di korupshon. Pueblo di Boneiru, si bo kier bai dilanti, si bo kier kaba ku korupshon ku yudansa di Hulanda, vota UPB tòg.

Tags:

Comments

  • Be the first to comment, please use the form below.

Post A Comment





0.6433 // 49