Karta Habrí na nos Huesnan

Nos por spera di boso, nos Huesnan, ku boso sa kiko ta pasando. Wikileaks y Edward Snowden a informá nos tur. E gueranan perpetuo y e situashon penoso di miyones di refugiadonan ta papia pa nan mes. Boso tin e kapasidat analítiko y e training intuitivo pa por detektá e kousanan. Boso ta enkargá ku poder estatal.

Di kon boso no ta intervení anto?

Nos Demokrasia Oksidental ta den proseso di wòrdu destruí. Poko poko, ku pasenshi y na un forma inteligente. E ta bayendo den direkshon di un forma nobo di fashismo tolerante, asta benevolente den sierto sentido … te ora e gòlpi di estado ta kompleto, naturalmente.  

‘Mind control’ masal via di media y internet ta den full swing. Komo mekanismo di kòntròl y represhon, internet te ainda no ta 100% efektivo, pero nan ta trahando duru riba esei. Por ehèmpel, na China nan ta kompilando un profil personal di tur siudadano. Kada hende ta haña un sifra di ‘krédito soshal’, notá den un tipo di ‘Registro di Krédito Soshal’. Ku esei gobièrnu por detektá y isolá ‘disidentenan’ fásilmente. Y konformistanan ta haña nan rekompensa den forma di funshonnan haltu y bon pagá. Awe na China, mañan serka nos …

Den henter e sistema aki solamente dos ‘lèk’ a sobra: 1) de bes en kuando pueblo ta vota pa partidonan ku no ta 100% bou di kòntròl ainda y 2) de bes en kuando Poder Hudisial ta dikta fayonan ku no ta pas den e plan sekreto. Den tur otro aspekto e sistema ya ta perfekto kaba. Den e artíkulo aki e focus ta riba e di dos lèk, esta Poder Hudisial independiente y imparsial. Pasobra boso, nos Huesnan, ta e únikonan ku tin e poder estatal nesesario pa por prevení e gòlpi di estado sekreto ainda.  

Nos ta sita e ex-Prokuradó General di Korte Supremo na Den Haag, Sr. Arthur Hartkamp: “(..) si presidente di e ‘Raad voor de Rechtspraak’ (Konseho pa Poder Hudisial) ta kuminsá dikta kiko huesnan tin ku hasi, e ora ei nos ta den problema serio”. El a atvertí tambe ku kalidat di e trabou hudisial ta bahando. “Bou di preshon di Ministerio di Hustisia ta sèn y sifras so nan ta wak” (Mr. 1, 2014, página 28/29). Durante un speech na Boneiru na aña 2014 Presidente di nos propio Korte di Hustisia tambe a señalá e peliger aki.

Den su Speech di Despedida na aña 1961 Presidente Eisenhower a atvertí: “We must guard against the acquisition of unwarranted influence (…) by the Military-Industrial Complex. The potential for the disastrous rise of misplaced power exists and will persist. We must never let the weight of this combination endanger our liberties or democratic processes”. Eisenhower tabata un Republikano! Sigur nò un iskierdista fanátiko. E tabata militar y tabata bon na altura.

Poder Hudisial tin e poder estatal nesesario pa por defendé demokrasia y derecho humano. Pero e ora ei Huesnan tin ku kambia nan forma di traha. En bes di para wak y sakudí kabes, nan tin ku susha nan man y tribi di dirigí. Pa nan por hasi esei, mester presentá un kantidat grandi di kaso na Korte ku ta bai den un sierto direkshon, es desir den direkshon di Hustisia Natural y derecho y responsabilidat humano. Pero si Poder Hudisial ta sigui apoyá e ‘gòlpi di estado’ sekreto, e ora ei no tin sentido pa entamá kasonan ku ta promové Hustisia Natural.

Ta bien posibel ku e tenshon na Venezuela lo eskalá y ku un fluho di refugiado den barkunan chikitu lo yega na nos kosta. Si gobièrnu ta manda e hendenan aki laman bèk, manera Malaysia a hasi resientemente, nos kier sa kiko boso, nos Huesnan, lo hasi? Si ta hiba un Kaso Sumario pa ordená gobièrnu pa trata e hendenan aki mas humano, boso lo laba man for di e asuntu y disidí ku Korte no por trata un Kaso asina (‘niet-ontvankelijk’)? Si kontesta riba e pregunta aki ta “SÍ”, boso no ta kòrda un evento históriko kaminda algu similar a sosodé?

Ta horibel pa bisa esaki. Y un abogado por papia fásil. PERO, bèrdat ta keda ku Huesnan tin e poder estatal pa disidí. Y nan tin e trankilidat y silensio tambe pa penetrá te den profundidat di nan mente y alma pa haña e kontestanan hustu aya. Kontestanan ku ta lógiko, pero ta kuadra alabes ku nos sintimentu di hustisia. Y kòrda: Si boso, nos Huesnan, no ta aktua, NIUN HENDE lo aktua. Úniko kos ku pueblo por hasi ta guli manda abou òf rebeliá. Pero nos Huesnan por dirigí.

Pero e ora ei boso, nos Huesnan, mester sa den kua direkshon mester dirigí. Y tambe di kon mester dirigí den e direkshon ei. Riba e preguntanan aki boso tin ku meditá y konsentrá. Y si boso ta bai te den e profundidat mas hundu, e kontestanan lo aparesé. Apliká eseinan e ora ei, ‘even if the sky should fall down on our heads’ (asta si shelu lo kai riba nos kabes).

Michiel Bijkerk
Abogado, Bonaire

Tags:

Comments

  • Be the first to comment, please use the form below.

Post A Comment





0.4405 // 49