Por fin un organisashon pro hustisia pa migrante na Boneiru

Dia 19 de yüni 2007 a lanta Fundashon Internashonal ofi shalmente na ofisina di notario mr. Maarten Maartense. Su presidente ta Sr. M.A. (‘Hamudi’) Dabboussi, konosido direktor di City Shop. Su vice-presidente ta Sr. Feliciano da Silva Piloto, direktor di Voz di Bonaire. Sekretario ta Sr. Carlos E. Carlos Lopez Natera, empleado di Consulado Venezolano aki na Boneiru. Tesorero ta Sr. Liriano Mata, konosido direktor di Center Body Car Polo.

Respetá, integrá i no-diskriminá
Lema di e organisashon ta ‘respetá, integrá i no-diskriminá’. For di kuminsamentu e organisashon kier enfatisá ku rèspèt pa e ser humano ta sentral. Rèspèt di parti di e migrante pa ku pueblo i kultura Boneriano, pero di otro banda tambe rèspèt di e Boneriano pa ku e migrante.

Mirando ku e migrante ta bini di afó i ta buska di kuminsá un bida nobo aki serka nos, e tin un obligashon di integrá den nos komunidat. E tin ku hasi esfuerso pa siña nos idioma (esei ta muestra di rèspèt tambe) i siña kon nos komunidat ta funshoná. Por ehèmpel, un migrante mester sa kiko su derecho - i obligashonnan laboral ta. E mester sa ku su doño di trabou tin un obligashon di dunele un ‘pay-slip’ tur luna i ku e tin ku registrá serka SVB etc. etc.

Pero e migrante mester sa algu di nos kultura tambe. Por ehèmpel, e mester sa ku nos tin un gobièrnu insular i un gobièrnu sentral na Kòrsou. Lo ta bon si e ta tuma nota di e letra di e Himno di Boneiru i su melodia tambe. Enfin, tin diferente kos un migrante mester sa di nos sosiedat. Ta un kestion di rèspèt si e ta hasi esfuerso pa adaptá su mes na e kustumbernan di Boneiru. Manera nan ta bisa na Ingles: ‘When in Rome, do as the Romans do’. Ta e mihó manera pa bo biba den harmonia
ku e poblashon lokal.

Por último, e migrante no mester diskriminá kontra Boneriano. Esei ta lógiko. Di otro banda e Boneriano no mester diskriminá kontra e migrante tampoko. Lástimamente, esaki ta tumando lugá hopi na Boneiru. E fundashon lo mustra riba e diferente diskriminashonnan ku ta tumando lugá i lo hasi loke ta nesesario pa konsientisá tur hende i stòp e diskriminashon aki. Boneiru tin un karakter hopi mas mihó ku esei i nos tin sigur ku e organisashon lo logra trese e kambionan nesesario.

Benefisio mutuo
E migrante ta kontribuí ku su labor i sèn di impuesto na nos ekonomia. Naturalmente e tin benefi sio, si nò e lo a keda den su pais di orígin. Sin embargo, nos no por nenga ku e sèn di belasting i e labor ku e migrante ta presta ta na benefi sio di Boneiru tambe. Pues e koperashon aki ta pa benefisio mutuo. Esei ta enserá ku tin tur motibu pa respetá e migrante i sigur no tin niun motibu di hasi su bida difísil sin tin nodi

Direktiva
Direktiva general di Fundashon Internashonal ta konsistí di un òf dos representante di kada grupo étniko òf nashonal bibando na Boneiru. Tin representante di Libanon, Venezuela, Portugal, Sürnam, República Dominicana, Venezuela, Colombia, China, Haití i Perú. Ademas tin un òf dos miembro konsehero ku ta representá e gruponan étniko ku ainda no a haña representashon den direktiva.

Dor ku e organisashon ta un fundashon i no un asosashon, e direktiva ta disidí kende lo forma parti di e direktiva. A skohe pa e tipo di organisashon aki konsientemente pa por mantené harmonia den direktiva tur ora. Por si akaso ta surgi kualkier malkomprondimiento, direktiva mes por solushoná esaki sin tin nodi di yama reunion di un kantidat grandi di organisashonnan nashonal di migrante. Un direktiva diario lo ta enkargá ku funshonamiento diario di e fundashon.

Enkuentro soshal
Pronto lo organisá un enkuentro soshal pa tur migrante bibá na Boneiru pa duna splikashon amplio di tur e metanan konkreto i forma di proseder di e fundashon nobo aki. Por fin a lanta un organisashon na Boneiru ku lo sali na defensa di interes di migrante i asina tambe na interes di Boneiru en general. Pasobra harmonia ta na interes di tur hende.

Comments

  • Be the first to comment, please use the form below.

Post A Comment





1.2500 // 49