Nos mes no por nada; huntu nos por. Nos bida mes kada sekònde ta dependé totalmente di e boluntat di Dios. Nos kurason ta bati mas ku 100.000 biaha pa dia. Si e faya algun minüt, bo no t’ei mas. Kon nos por kere ku ‘Nos mes por’? Ta ken ta sòru ku e kurason ta sigui bati? Abo mes? E lema di ‘Nos mes por’ tabata unu robes for di kuminsamentu. Asta e pais mas potente na mundu no por sobreviví sin petroleo di Medio-Oriente, por ehèmpel. Pues, asta Merka no por bisa ‘Nos mes por’. Pero nos komo un di e paisnan mas chikitu na mundu ta skohe komo lema nashonal ‘Nos mes por’.

Esaki ta un di nos problemanan (si nos ta dispuesto di wak den spil), ku nos ta eksagerá nos propio importansia. En realidat nos no ta mas ku 5 punta di feneta riba mapa. Ta p’esei nos a skohe un lema nashonal ku realmente ta inalkansabel. E tempu a yega pa nos realisá esei. Huntu nos por.

Interdependensia
Paisnan rònt mundu ta dependé di otro. Hulanda ta dependé di Union Europeo. Nos ta dependé di Hulanda. No tin bèrguensa den esei. E ta un ‘fact of life’.

E interdependensia aki ta birando mas intenso asta diariamente. Esei ta enserá ku paisnan rònt di nos (i Hulanda mas ku tur) ta hañando mas i mas di bisa over di nos asuntunan. Meskos ku Union Europeo ta disidí pa Hulanda riba vários tereno, asina ta ku Hulanda lo haña mas di bisa over di sierto asuntunan aki na Antia. I meskos
ku Hulanda tin ku duna kuenta i rason na Union Euopeo, asina ta ku nos tambe lo tin di bai duna kuenta i rason na Hulanda.

Kòntròl i supervishon ta un kos mashá normal i asta nos mester ta kontentu kuné. Pasobra e lo duna nos polítikonan ménos chèns pa spat nos sèn di belasting pa loko,
algu ku nos tur sa ku nan ta gusta hasi. Ta p’esei e lucha di Kòrsou kontra e ‘slotverklaring’ tabata inesesario i indefensible.

Hulanda no ta nos enemigu
For di segundo guera mundial, Hulanda a yuda Antia. Hulanda a manda sèn i asistensia tékniko. Nan a mantené forsanan armá na Antia pa defendé nos islanan kontra posibel atakenan. Nan a mantené kontaktonan ku eksterior pa nos, nan a pèrmití miles di hóbennan pa bai studia na Hulanda dunando nan beka, nan a akseptá tur Antiano ku no a mira un futuru na Antia mas, mientras ku Antia te dia di awe no ta akseptá tur Hulandes.

Nos asosashon ku Hulanda realmente a tene nos na bida durante último 50 aña. Esun ku ta bisa ku e no ta konfi a Hulanda ta siegá ku odio i propaganda.

Tags: bes, independence

Comments

  • Be the first to comment, please use the form below.

Post A Comment





0.4124 // 49