‘Justitia derogat Legi’ (JΔL)

Un mama tabata kastigá su yu.
“Un luna largu bo no ta haña kuminda anochi! Y bo 3 pushinan tampoko!”

Ora e tata a yega kas su yu tabata yorando.
“Kiko a pasa?”, el a puntra.
“Richa a violá Regla X di nos Representante di Reino (RdR)!”
“Pero di kon bo ta kastigá su 3 pushinan anto? E pushinan no a hasi nada tòg?”
“Oké, mi tabata rabiá. Ora Richa ta drumi, lo mi duna su pushinan kuminda”.

“Pero, bisa mi, e Regla X ei ta práktiko?”, e tata a puntra.
“Esei mi no sa. Regla ta Regla! Y tur esnan ku ta violá lei mester wòrdu kastigá. Si no, ta desòrdu nos ta haña”.
“Pero tur hende ta violá Regla X”.
“Esei por ta, pero nos yu mester siña respetá Lei! Lei no t’ei por nada!”
“Esei sí ta bèrdat”, e tata a bisa.

“Pero ta asina ku e Regla X ei ta konta pa tur hende?”
“Nò, e no ta konta pa e hendenan di Mal Pais!”
“Pero e hendenan ei tin mag di biba akinan huntu ku nos na BEST. Nan tin un pèrmit”.
“Sí, pero nos mester sali na defensa di nos mes hendenan”.
“Einan bo tin rason. Bo a pens’é hopi bon”.

Despues di reflekshon e tata a bisa:
”Nos RdR por defendé nos dor di no atmití imigrantenan NOBO for di Mal Pais”.
“Esei no ta mi asuntu”, e mama a kontesta: “Lei ta Lei!”.

Einan e diskushon a kaba. E mama su lógika tabata fuerte. Tòg e tata a bin bèk ku otro pregunta:
“Pero bo ta haña e Regla X aki hustu? Nos ta risibí mesun mal trato na Mal Pais?”
“Bon, si e Mal Paisanonan ta trata ami asina, ami sigur lo a rabia hopi”.

Un silensio a kai.

“Lei t’ei pa Hustisia prevalesé”, e tata a opservá.
“Mi ta bai pidi RdR pa stòp di apliká e Regla X ei. Anto si e ta nenga, mi ta bai Korte. Pasobra RdR su trabou ta pa pone òrdu, pero Hues ta dikta kiko ta Hustu. Esei ta su tarea, meta y funshon”.
“Sí”, e mama a bisa. “Mi ta bai buska Richa awor. Anto e ora ei nos tur ta kome huntu”.

Pa Hustisia prevalesé. ‘Justitia derogat Legi’ (JΔL)
Ofisina di Abogasia JΔL
Michiel Bijkerk

Tags:

Comments

  • Be the first to comment, please use the form below.

Post A Comment





0.3849 // 49