E di diestres Karta Habrí na Poder Hudisial

NOS HUESNAN TA KORUPTO? E pregunta aki a ser hasí den konekshon ku e serie di Kartanan Habrí aki. Nos lo kontest’é personalmente. Durante kasi 30 aña den abogasia, un solo biaha tabatin motibu pa duda. Sospecho den e kaso ei tabata ku e kontrapartido a yuda un hues haña kontakto ku prostitutanan.

No tin prueba, pues nos semper a keda ketu over di e kaso aki. Y esei lo no kambia awor. Sin prueba legal y konvinsente tur hende ta inosente. E regla aki (konosí komo ‘presumptio innocentiae’) ta konta pa huesnan tambe.

Pues nos konklushon ta: ‘Nò, nos huesnan no ta korupto’. Nos no tin niun indikashon serio ku sèn a pasa bou di mesa pa influenshá huesnan tuma sierto desishon den kasonan spesífiko. Sin e base aki, hurisdikshon real no ta posibel. Pues serka nos esei ta posibel ainda. Hopi bon!

SI TA BANDONÁ e regla aki, es desir ku mester asumí inosensia di tur hende te ora por prueba su kulpabilidat, nos ta habri porta pa fasismo. Un viktoria remarkabel pa fasismo a ser anotá na Merka, espesífikamente na e prizòn di Guantánamo. Wikileaks a publiká e akusashonnan kontra tur e detenidonan será den e prizòn aki den e asina yamá ‘Gitmo Files’. Konklushon ta ku “the overwhelming majority of the detainees are not accused of terrorism and will never be charged or tried”.

Esaki segun e revista Guardian na 2013, ku ta agregá: “(…) how can there be a presumption of innocence at Guantánamo, when even innocent men who have long been cleared remain imprisoned?” Chèk aki: http://www.theguardian.com/world/2013/nov/13/guantanamo-bay-missing-point

LAMENTABEL ta ku Poder Hudisial komo instansia nunka no a sensurá e tipo di abuso fasista aki na un forma kla y desidido. Den kasonan individual kisas, pero nos mes no a ripará hopi di esei.

Esnan ku ta kere ku no ta tarea di Korte pa sensurá gobièrnu, mester kompará nos situashon aktual ku e periodo promé ku Segundo Guera Mundial. Den un demokrasia Poder Hudisial mester kana dilanti pa para fasismo. Pero esei no a sosodé durante e periodo promé ku Segundo Guera Mundial. Y awor atrobe e no ta sosodiendo ...

Pues kisas ‘liber di korupshon’ ta enserá algu mas ku solamente keda sin tuma soborno? Kisas ta eksistí algu ku por ser yamá ‘korupshon moral’? Por ehèmpel, keda ketu ora ku tin obligashon moral pa papia pa defendé komunidat? Si ta husga Poder Hudisial den e sentido aki, e veredikto sí ta negativo.

POR EHÈMPEL, e situashon na Guantánamo. Fiskal ta rekonosé ku un kantidat grandi di e detenidonan ayanan ta inosente. Tòg nan ta keda será ketu bai. E situashon aki ta andando añanan largu kaba. Ta razonabel pa verwagt ku Korte Supremo di Merka lo a publiká un opinion hopi skèrpi over di e abuso aki y lo a sensurá gobièrnu Merikano na un forma kla y raspá. Pero esei no a sosodé.

Den algun verediktonan individual Korte Supremo sí a yega di murmurá un tiki di bèrdat, pero realmente kondená, denunsiá y oponé e abuso fasista aki, nan nunka no a hasi. Korte Supremo ta preferá di laga aktivistanan hasi esei, ku no tin e poder estatal nesesario pa por hasi esei. Huesnan ta sera nan mes den nan ‘Ivoren Toren’, es desir nan ta wak, sakudí kabes y keda ketu. Kompará e periodo promé ku Segundo Guera Mundial …

Y ora Wikileaks ta tribi di publiká e hechonan real, e huesnan Merikano asta ta kapas – aparentemente sin niun escrúpulo – pa kondená hendenan manera Julian Assange, por si akaso e último aki ta kai den man di Merka.

Nos ta duna homenahe na Presidente Rafael Correa di Ecuador, kende Estados Unidos ta akusá di violashonnan di derechonan humano, pero kende siguramente ta sakando su garganta pa defendé derechonan humano di Assange.

Si huesnan ta mas kla y firme, nan por kòrta e abuso fasista den tòm, di moda ku situashonnan apsurdo manera esun di Assange lo no por surgi y sigur lo no por perdurá.

Y KON E SITUASHON TA SERKA NOS? Ta fásil pa husga Merka. Manera reporteronan na Egipto ta bisa: ‘’Tur hende tin derecho di ekspreshon liber na Egipto, basta bo ta kritiká Merka so”. Pero kiko lo pasa si abogadonan ta kuminsá kritiká nos propio huesnan?

Anto esei ta kondusí na un otro pregunta. Por ta asina ku nos huesnan Hulandes y Antiano tin prehuisio polítiko? E kontesta riba e pregunta ei tambe ta kla. E kontesta ta: ‘Sí!’ Esaki lo sali na kla den nos siguiente Kartanan Habrí.

E KARTA AKI ta terminá ku un sugerensia. Promé ku Wikileaks, hende tabata usa e simpel método di un ènvelòp den un Buzon. Djis hinka un ènvelòp – SIN NÒMBER DI REMITENTE RIBA DJE – den Buzon di un hende ku lo hasi algu ku e informashon ku abo ta haña ta importante. Mester ta informashon outéntiko sí, por ehèmpel fotokopia di dokumentonan original. E ora ei e resipiente lo por publik’é, entregá un denunsia ofisial, òf hasi algu otro.

Ki dia un Wikileaks-hues ta lanta y ta pone un ènvelòp ANÓNIMO den nos Buzon na Seru Grandi #80?

Golden Meand Society,
Michiel Bijkerk, abogado,
Bonaire, 10 dezèmber 2015

Tags:

Comments

  • Be the first to comment, please use the form below.

Post A Comment





1.0324 // 49