Kasi tur Kristian lo sigurá bo ku e ta un pekadó. Nan ta pretendé asta ku nan ta pekadó for di nasimentu. Ban analisá esaki un ratu. Supongamos ku un hende ta konta bo k’e tin un problema ku un hende. Riba bo pregunta kon e ta pensa di solushon’é, e ta bisa bo ku e ta buskando un ‘manera indirekto’ (den palabra kla: ‘un mentira’) pa hèndel e situashon. E ora ei bo sa ku e persona en kestion no ta sinsero. Kon bo por verwagt ku e lo trata abo honestamente mañan? E ta kapas di gaña bo tambe.

Pues ban bèk n’e pekadó awor. E mes ta bisa bo k’e ta un pekadó. Pues, kon bo por kere ku e lo keda sin peka pa ku bo persona? Al kontrario, bo por tin sigur ku e lo peka pa ku abo mes tambe. E mes a atvertí bo delantá, bisando: ‘Paga tinu, mi ta un pekadó!’ Pues bo por verwagt ku e lo gaña i hòrta bo. Asta e por hasi kos pió, pasobra bo nunka no sa kiko un pekadó lo por hasi!

Ta kla ku nos ta skirbiendo aki den un stail satíriko pa klariá un punto, esta ku hende ku ta bisa ku nan ta pekadó normalmente no ta men é. Den kurazon di nan kurazon nan kier men ku nan ta hende desente, presísamente pasobra nan ta atmití ku nan ta pekadó! Pues ora un hende ta bisa bo ku e ta un pekadó, en realidat e kier men nèt lo kontrario. Esei ta un manera basta indirekto pa bisa kos! Un tiki hipókrito, kisas?

Anto e ora ei e pekadónan ta bai mas aleu ainda. Nan lo atvertí bo kontra orguyo di esnan ku ta yama nan mes ‘bon hende’. Segun e pekadónan, hende ku ta konsiderá nan mes ‘bon hende’ ta e pekadónan di mas malu ku tin, pasobra orguyo (vanidat) ta hole stinki i ta un piká hopi serio di bèrdat. Pues hende mester yama nan mes ‘pekadó’, si nan kier ta hende bon i desente! Mundu ta straño.

Ku otro palabra, e pekadó ta un hipókrito i e ‘bon hende’ ta orguyoso (den sentido negativo). Ta parse ku nos no por gana nunka! Òf nos ta lubidá un kos? No ta asina ku Kristu a bisa: ‘No huzga, pa bo no wòrdu huzgá! (Mateo 7:1). Mayoria di nos ta kere ku esei ta nifiká ku bo no mester huzga otro hende. Pero nos aná-lisis ta mustra ku e tambe ta nifiká ku bo no mester huzga bo mes. Si bo ta konsiderá bo mes un pekadó, bo ta hipókrito. Si bo ta konsiderá bo mes un ‘bon hende’, bo ta orguyoso (‘presumido’). Úniko manera pa sali for di e kontradikshon aki ta pa sim-plemente hasi loke bo ta kere ta hustu i no wòri kiko otro hende lo pensa.

ARCO tin un reputashon pa duna mensahenan di Pasku straño. Nos ta spera ku nos no a laga nos lesadóan na kaya!

Bon Pasku tur hende!

Tags:

Comments

  • Be the first to comment, please use the form below.

Post A Comment





1.0642 // 49