Outòrnan di ‘Zwartboek’ i otro persona prekupá ku korupshon na Boneiru, Saba i Statia por ta kontentu. Despues di hopi aña i hopi papiamentu bashí, por fin WolBES ta introdusí algun medida konkreto pa prevení korupshon i duna nos pueblo mas idea kiko nos gobièrnu ta hasiendo ku nos sèn di belasting.

Aparte di e medida mas importante, esta e Komishon di Supervishon Finansiero (Commissie Financieel Toezicht) ku a kuminsá funshoná kaba, den WolBES tin e siguiente medidanan:

Medida 1: Diputadonan mester revelá kua ‘side-job’ nan tin

Kada diputado i miembro di Konseho Insular mester publiká tur ‘side-job’ ku nan ta hasi, esta trabounan sekundario ku nan ta hasi banda di nan trabou komo diputado òf miembro di Konseho Insular. E side-job-nan aki no mag kousa niun konflikto di interes. Pues si un diputado tin un job na banda ku por konfliktá ku su trabou komo diputado (p.e. diputado di DROB ta alabes direktor di un kompania di konstrukshon), e tin ku stòp di hasi e side-job.

Medida 2: Diputadonan mester entregá un lista di tur nan poseshonnan 

Kada diputado mester entregá un lista presiso i kompleto di tur su propiedatnan promé ku e por kuminsá traha. Di e forma ei ta posibel pa kontrolá kuantu propiedat e tin despues ku e ta baha. Lástimamente    WolBES no ta obligá nan di entregá un lista similar anualmente i dia nan ta baha, pa hasi kòntròl públiko mas fásil. Den e aspekto ei WolBES ta faya. Pero e medida aki sikiera ta un komienso di transparensia òf e sistema di ‘full disclosure’.

Medida 3: Instalashon di un Kontrolaria Komun pa e isla-nan di BES 

Konseho Insular di e tres islanan di BES ta instalá un Kontrolaria Komun pa hasi investigashon den funshonamientu di gobièrnu, tantu pa detektá posibel iregularidatnan komo pa evaluá efisiensia di gobièrnu su funshonamientu. Kon esaki lo funshoná den praktika ta difísil pa premirá, pero e ta un arma den man di Konseho Insular pa kontrolá gobièrnu, lokual ta nesesario de bes en kuando sigur!

Tags: bes, wolbes

Comments

  • Be the first to comment, please use the form below.

Post A Comment





0.6005 // 49