Riba nos website nos tin un botòn di ‘Outstanding Music’. Ayanan nos ta pone video i oudio di músika di tur parti di mundu. Músika ku nos ta haña ta sobresalí. Músika eterno, popular, klásiko i moderno. Pero solamente piesanan ku realmente ta ekselente.

Orambú (orashon di tambú)
E biaha aki nos a skohe un piesa di e kompositor Kurasoleño Erwin Prudensia, titulá ‘Orambú’. E piesa aki ta un tambú original di Kòrsou, usá den su forma original, esta komo un forma di orashon. Ora bo ta skucha e piesa aki, bo ta bai komprondé ku esaki ta un orashon di bèrdat. Anto un orashon ku ta toka bo alma dirèkt. Vokalistanan ta: Ludsella Sambo, Merly Augusta i Niata Augusta; Músikonan ta: Donald Mercelina (perkushon) i Ruchi Isidora (chapi).

Nos ta konsiderá e piesa aki unu di nivel internashonal. E hecho ku kasi niun hende konos’é ta simplemente pasobra pa un òf otro motibu e no a haña atenshon na e momentu korekto. Nos ta spera ku e artíkulo aki por kambia esei. Esaki realmente ta músika. Si e no ta toka bo, bo ta morto kaba.

Mas piesa ekselente di Antia

Nos kier kolektá mas piesa ekselente di Antia i sobrá di Karibe pa inkluí den nos kolekshon. Nos a kuminsá ku un sondeo chikitu riba kaya kaba, puntrando hende kua piesa di músika di Boneiru, Aruba i Kòrsou nan ta haña ekselente. Te ainda nos no a haña sugerensianan fiho, pero nan lo bini sigur. Kualkier persona ku kier sugerí algu, por fabor tuma kontakto ku nos. Lo yuda hopi si bo piesa preferí ta riba CD, pero nos por hèndel kasèt tambe.

Otro piesanan den nos kolekshon
Te na e momentu aki nos a inkluí e siguiente piesanan den nos kolekshon:
1) ‘Orambú’, Erwin Prudencia;
2) ‘El Rey’, Jose Alfredo Jimenez;
3) ‘Adagio’, Albinoni;
4) ‘Adagio for Strings’, S.Barber;
5) ‘O Fortuna’, Carl Orff;
6) ‘Ojalá qu llueva café’, J.L. Guerra;
7) ‘Democracy is coming to the USA’, Leonard Cohen.

Tags: democracy

Comments

  • Be the first to comment, please use the form below.

Post A Comment





0.8785 // 49