Un evolushon na fabor di tur ku ta biba den Reino

Ponensianan inbalansá

Tin diferente ponensia ku ta ser ripití mas i mas hopi bayendo e referendum pa ahusta e relashonnan entre e 7 partnernan den Reino. E promé, entre otro ta zona asina:

Mientras Hulanda i nos mes mandatarionan sigui:oprimi, rechasá, neglishá, despresiá i sigui ninga yunan di tera e derechi di eksistensia i outo-determinashon, esnan oprimí lo sigui hasi tur tipo di maldat ku bini na nan mente.

Atrako, ladronisia, trafikashon di droga, benta di droga, kontrabanda, korupshon, estafa, malver-sashon, prostitushon, inmoralidat hubenil, violen-sia, maltrato, asesinato, brueria, rebeldia i tur otro sorto di maldat ta poderando nan mes di nos komunidat pa gran parti a rais di e inhustisia i opreshon hulandes. Nos mes hendenan no ta haña e oportunidat pa bai dilanti.



E último aki ta un sita for di un remetido.

E konekshon entre nos pasado kolonial i e kosnan malu ku ta pasa na Kòrsou bayendo nos referendum di 15 di Mei próksimo no ta komprondibel si nos mira ku paisnan ku ta kompletamente inde-pendiente pa diferente siglo kaba, manera Haiti i Venezuela, ta pasa den mesun tipo di maldat ku nos.

Na Haití i Venezuela e kresementu di kriminalidat ta muchu mas grandi ku na Kòrsou, entre otro atrako, ladronisia, trafikashon di droga, benta di droga, kontrabanda, korupshon, estafa, malversashon, prostitushon, inmoralidat hubenil, violensia, maltrato, asesinato, brueria, rebeldia i tur otro sorto di maldat ku ta poderando di nan komunidat tambe. Esaki ta pa keda serka di kas.

No tin korelashon entre  kolonialismo i kriminalidat

Realmente no tin un korelashon direkto entre kolonisashon i e kresementu di e lista di kosnan malu ku ta sosodé entre “hende ku hende” i ku ta kresiendo na tur otro pais igual òf mas lihé ku serka nos, sea ku nan a ser kolonisá òf nò.

Otro ponensia bruá

E otro ponensia hopi tendé na diferente forma i ku no ta tene kuenta ku e realidat ku historia ta un fenómeno ku ta evolushoná ta ku ‘pasobra West Indische Compagnie a benta nos antepasadonan ku a ser tresé komo esklabo riba e pida baranka aki, nan desendientenan tin mas derecho komo siudadano ku otronan, paso nan tin sanger di eks-esklabo den nan bena.

Nan ta supoos di tin mas derecho di ta siudadano di e baranka aki ku otronan ku a bin biba, promé òf despues di nan riba e isla aki.

Segun mi den e pais aki mashá dia nos ta biba den un demokrasia moderno kaminda tur hende ta igual ante lei.

Ami asta ta kere ku un mayoria grandi di esnan ku ta biba riba e baranka aki AWORAKÍ, nan antepasadonan a bin e isla aki HUSTAMENTE pa motibu di e bandera Hulandes.

Na Kòrsou nan a bin haña refugio.

  • Nan a bin aki komo refugiado religioso (hudiunan for di dife-rente parti di mundu, Hugenoten for di Fransia, Kristiannan for di paisnan Árabe),
  • Refugiado ekonómiko, for di Haiti, Santo Domingo, Cuba i Latino Amérika,
  • Refugiado polítiko for di Latino Amérika, 
  • Refugiado pa motibu di Guera ku ta Vietnamesnan, Chinesnan, Libanesnan, Sirionan, Palestino-nan.
  • I tin míles i míles ku a bin aki hustamente pasobra tabata tin oportunidatnan ekonómiko enorme riba e isla pa motibu di binida di SHELL ku na sierto momentu tabata duna empleo na mas ku 20 mil trahadó. Niun di esakinan no a bin ku un bala di heru mará nan nan ènkel.


E realidat raspá

Segun mi ta esei ta e realidat raspá di e Kòrsou di awe, i di mayoria di yu Kòrsou ku ta mira padilanti i ta trahando riba nan futuro bou di e paraplu grandi ku yama REINO HULANDES, mirando den nan “Winshil di bida” konstantemente pa grap kada oportunidat ku tin nan dilanti. Nan sa ku nan tin un spil di patras i “once in a while” nan ta mira den dje, pero nan sa bon bon ku e spil di patras ta historia i no por mara nan futuro. Tambe nan sa ku ménos barera tin entre e partnernan mas e ta kumbiní tur siudadano den Reino. No ta pornada ku kasi mitar di tur hende ku a nase na Kòrsou ta bibá den un di e otro teritorionan den Reino.

Skibí pa un desendiente mesklá Afrikano-Amerindio-Europeo (vòlgòrde puramente alfabétiko)

Tags:

Comments

  • Be the first to comment, please use the form below.

Post A Comment





0.6088 // 49