Karta Habrí no. 5 dirigí na Poder Hudisial

E KAS ta nos komunidat. Sin base spiritual no por konstruí un komunidat hustu. Título di e artíkulo aki ta un versíkulo Bíbliko (Salmo 127). Pero e prinsipio ta konta igual si e base ta Hinduismo òf Islam. ‘Dios’ ta nifiká ‘Deidat Inmenso Omnipotente y Spiritual’, òf algu similar. Nos no ta referí na niun religion spesífiko. Hustisia ta e eko di e Divino den tur religion. Y si e eko aki no ta resoná, e trahadónan ta mula enbano.

Sin embargo, e forma ku religion ta manifestá su mes último dékadanan, ta problemátiko. Tòg nos no ta rechasá religion. Pasobra sin Dios, no tin nada. Ademas, esensia di tur religion ta igual. Y e esensia ei ta duna nos bida sentido y direkshon étiko. Komo base di komunidat religion ta indispensabel. Pero den nos sistema polítiko, religion no tin poder estatal efektivo, di moda ku e no por wòrdu usá pa konstruí nos KAS na un forma metódiko.

Y nos polítika sekular di awendia a pèrdè tur direkshon spiritual. Aparte di Mantené Òrdu y Tene Atministrashon Públiko, e úniko kos ku polítika ta hasi ta adorá e asina yamá ‘Merkado’. E metanan prinsipal pa hisa Nivel Spiritual di Pueblo y pa Krea un komunidat mas hustu, a keda bandoná. Segun polítika moderno, e KAS ta kla. Pero e KAS aki ku supuestamente ta ‘kla’, ta basá riba Stimashon di Plaka y Desigualdat. Y e ta kousa guera tras guera sin final. 

HUSTISIA KOMO MÉTODO. Konklushon ta ku mester usa Hustisia komo Método. Esaki ta un konsepto nobo. Pero kiko por ta mas lógiko? Si nos ta apliká Hustisia komo método pa krea un komunidat mas hustu, nos no por faya. Pasobra si e ta Hustu, e mester ta bon. Asumiendo, naturalmente, ku nos huesnan sa kiko ta Hustu. Pero si nan NO sa esei, nan tin ku bai kas. Pasobra nan trabou ta pa apliká Hustisia. Y si nan no ta kapas di hasi esei, ta ken lo por hasi’é anto?

Nos ta biba den un Era Nobo. Esei ta eksigí un Direkshon y Métodonan Nobo. Polítika y religion NO a trese solushon pa humanidat. Al kontrario, Medio-Oriente ta kimando y miyones di migrante ta kousando káos. Y den tur e desórden aki un tal Donald Trump ta grita ku mester deportá tur ilegalnan. Y durante un Debate Presidensial e ta konta kon el a kumpra tur polítiko pa pone nan hasi presis loke e kier. Añanan largu kaba. P’e ta ‘Business as usual’.  

TA P’ESEI NOS TA SKOHE pa Hustisia komo Método. Pa hopi hende esaki ta muchu apstrakto. Mas konkreto pues. Un organisashon nobo lo inisiá un gran kantidat di kasonan pa poko poko krea un komunidat mas hustu. Y pa promové Pas. Esaki ta un proseso largu. Esei ta bèrdat. Pero e ta bai tuma hopi tempu anyhow pa nos sali for di e ‘mess’ internashonal ku nos a hinka nos mes aden. Mihó un solushon lento y sigur ku guera- y krísisnan perpetuo.

Mas konkreto ainda. Nos por konsiderá pa lanta un kaso pidiendo Korte pa ordená Gobièrnu Hulandes pa sali for di NATO y skohe pa neutralidat. For di siglo 19 Hulanda a desaroyá su mes komo e Hues Internashonal. Kasi tur Kortenan Internashonal ta establesé na Den Haag. Hulanda NO por hunga e papel di Hues aki, si e ta sigui partisipá den tur e gueranan di NATO. Si mañan Siria ta aserká Korte Internashonal di UN na Den Haag, pidiendo pa ordená Merka pa stòp di destabilisá e régimen di Assad (loke Merka kasi sigur ta hasiendo kaba!), e ora ei Hulanda no por trata un kaso asina, pasobra avionnan Hulandes ya a partisipá den e guera kontra ISIS kaba. Komo Hues Hulanda mester ta neutral, es desir independiente y imparsial.  

STREA DI NORT. Un kolega ya a puntra si nos a pèrdè Strea di Nort? E pregunta ei ta bon biní. E ta señalá progreso. Pasobra un persona ku ta hasi un pregunta asin’ei, sikiera a pensa. Y miéntras ku e situashon internashonal ta sigui empeorá, e kestion di guera òf neutralidat lo bira mas y mas urgente. Y un kaso hudisial públiko por ta un katalisator fuerte pa krea konsenshi den pueblo, hasta si Korte ta rechas’é.

Kon ku bai bini, por lo pronto nos lo limitá nos mes na issue-nan ménos kompliká. A duna e ehèmpel djis pa splika ku ta trata aki di un Método nobo. Hustisia komo Método. Usando e método aki den práktika, nos lo haña sa kiko ta faktibel y kiko nò. Ya a entamá 2 kaso kaba ku tin komo meta pa hisa AOV-uitkering na BES te na nivel di AOW Hulandes.

GMS. E organisashon yama ‘Golden Meand Society’. A skohe e palabra ‘society’ pa indiká kon e organisashon lo funshoná, pero tambe pa referí na ‘komunidat’ en general. Por haña mas informashon na www.arcocarib.com den e ‘free e-book’: ‘Paradigm Regained’. Di kon ta skirbi ‘Meand’ en bes di ‘Mean’, tambe ta wòrdu revelá den e buki ‘Paradigm Regained’. 

No spanta. Ta un buki kòrtiku. Den un ratu di ora bo por kaba les’é.

Bonaire, 27 ougùstùs 2015
Michiel Bijkerk, abogado

Tags:

Comments

  • Be the first to comment, please use the form below.

Post A Comment





0.8467 // 49