Na e momentunan aki, Mundu no tin direkshon. Hende no sa mas ki ideologia nan mester kere aden. Na Boneiru, por ehèmpel, bo tin e kontroversia entre soshalismo i kapitalismo ketu bai. Partido Demokrat ta kere den soshalismo. Nan a bira miembro asta di e organisashon mundial soshalista (ISO).  Den práktika PDB no ta propagá ideanan soshalista mas, pero kiko pueblo sa? Loke PDB ta ‘bla bla bla’ ta zona bon, i pa hopi hende esei ta sufisiente. 

Durante kampaña elektoral PDB no ta bisa klaramente ku nan ideologia ta soshalista, pasobra nan tin miedu di pèrdè voto. Ni e ‘guts’ di papia bèrdat nan no tin. Soshalismo ta e sistema polítiko di Cuba i Rusia anteriormente. El a resultá den diktadura kruel i pobresa sin igual pa e pueblo.

Cuba
Soshalismo tin un parti bon tambe, nos no ta nenga. Cuba a logra organisá un bon sistema edukashonal i un ekselente sistema di salubridat públiko. Cuba por ta orguyoso di esei. Ta un gran logro!
Pero esei no ta eksepshonal. Nos tambe tin bon skol i un sistema di salubridat ku seguramente mester wòrdu drechá (anto seriamente), pero ku por pasa tòg. Kon ku bai bin, bon salubridat públiko no ta un privilegio di soshalismo, ounke nos ta respetá i atmirá e gran avansenan ku Cuba bou di Fidel Castro a logra riba e tereno aki.

Kiko mester hasi anto?
Esei no kier men ku nos mester bai pa soshalismo, manera PDB ta hasi (pero no ta durf bisa). Soshalismo ta un kaminda ku a demostrá su fayonan den práktika kaba. Anto ampliamente. Nos mester bai pa kapitalismo anto? After all, e kapitalistanan a gana e Guera Friu kontra Rusia i kontra soshalismo en general. Esei kier men ku kapitalismo ta bon anto?

No! Tampoko. Na Boneiru UPB sem per a propagá nan forma di kapitalismo. Pero komo sistema polítiko kapitalismo tin su fayonan grandi tambe. Den sierto kos - vooral riba tereno ekonómiko - kapitalismo tin bentahanan, pero e ta un sistema ku ta pone sèn na promé lugá i hende na di dos lugá. Esei ta resultá den brutalidat mesun kruel ku e soshalistanan ta kulpabel di dje. Pues no kere ku
nos ta kompletamente pro kapitalismo ora nos ta duna un konseho di voto pro UPB. Kapitalismo i UPB tin nan fayonan serio, pero tin motibunan práktiko di kon na e momentu aki nos ta duna un konseho di voto pro UPB. Nos lo splika esei den mas detaye den nos siguiente edishon. 

Comments

  • Be the first to comment, please use the form below.

Post A Comment





0.4070 // 49