Esaki ta un referendum, no un kampaña polítiko
Naturalmente titulo di e artíkulo aki ta eksagerá. Pero no totalmente. E kampo di ‘Nò’ a konbertí e referendum aki den un kampaña polítiko. Nan ke pa bo VOTA PA NAN, no pa e kestion di referendum! Nan ke pa bo kere ku nan lo drecha tur kos, basta bo vota ‘Nò’ awor i vota pa nan mañan. Anto e ora ei Wiels, PLKP i Cooper lo dirigí Kòrsou rumbo pa independensia total di e maldito makambanan.
PAR i e otro partidonan na mando a kometé mesun eror. Tabata un eror grave pa mara destino di gobièrnu na resultado di e referendum. Di e forma aki nan a konbertí e referendum den un moshon di deskonfiansa kontra gobièrnu en bes di un vota-shon públiko over di destino di pueblo.
Asina nos ta mira un biaha mas ku nos polítikonan ainda no tin madures di liderasgo. Nan ta konsiderá nan mes mas importante ku e kousa komun. Ku lidernan asina, Dios spar Kòrsou!
Kabes friu
Ta p’esei pueblo ta tur konfundí. Pueblo ta kere ku nan tin ku vota pa hende en bes di nan destino. Anto ora nan ta mira nos polítikonan, nan no por skohe pasobra nan tur ta malu.
Pa e motibu ei ARCO ta saka e ‘referendum speshal’ aki pa duna informashon ku kabes friu over di e kestion di referendum, no over di e polítikonan involví. ARCO nunka no ta skonde su pensamentu real. Nos ta kere ku e mihó opshon pa Kòrsou ta pa vota ‘Sí’. No pasobra e No-istanan no tin niun bon argumento. Simplemente pasobra ‘Sí’ ta kumbiní mas ko ‘Nò’.
Union den Reino
Esaki ta e di tres biaha ku Hulanda ta bin yuda Antia solushoná su problema finansiero. Dos biaha kaba nan a sanea nos debenan, ku kada biaha a subi te na montantenan astronómiko.
Awor Antia tin un debe di +/- 5.5 miyar di florin. Hopi hende ta kere ku Antia debe Hulanda e sèn aki. Esei no ta e kaso. Ménos ku 10% di e debe total nos debe Hulanda (entre 500 te 600 miyòn). Parti mas grandi (90%) gobièrnu Antinao debe hende i instituto lokal (Bankonan i Antianonan riku, pa papia palabra kla).
Pues Hulanda un biaha mas ta demostrá ku nan ta un bon partner den Reino ku no ta laga Antia na kaya den momentu di difikultat. Solamente e biaha aki nan a pone 2 kondishon:
1) Kòntròl finansiero den forma di College van Toezicht (‘Cft’) i
2) Kòntròl hudisial den forma di e ‘aanwijzingsbevoegdheid’ pa por hiba polítiko korupto dilanti mesa bèrdè.
Progreso ta bal mas ku stagnashon
E di dos kondishon aki asta Hulanda a laga kai parsialmente pa motibu di krítika entre otro di Raad van State i hues Bob Wit. Pues di tur forma Hulanda a de-mostrá di ta razonabel den su approach. Nos di ARCO tambe tin nos krítika di Hulanda, pero poniendo tur kos den balansa, nos mester konkluí ku progreso ta mas mihó ku stagnashon. ‘Nó’ ta stanka tur kos. ‘Sí’ por tin su desbentaha, pero sikiera nos ta move. Ademas, ‘Sí’ no ta sera tur posibilidat pa drecha òf kambia kos den futuru. A keda palabrá kaba ku despues di 5 aña partnernan den Reino lo evaluá e struktura nobo.
