ATRAKADONAN TA BAI KU BOTIN 14 MIL FLORIN

WILLEMSTAD,- For di huida di presunan for di prison Bon Futuro, kasonan di atrako brutal den kas di famia a oumentá.

Ayera nochi den kareda di 9'or, EXTRA a tuma nota di un atrako ku a tuma lugá na un karpinteria anekso na kas dje propietario, kaminda e atrakadónan a bai ku alrededor di 14 mil florin.
Tabata kuater tipo ku a sorprendé e famia. E tiponan tabatin kara tapa, miéntras ku dos tabatin arma di kandela. Bou di menasa, a bai ku dos laptop, prenda, oloshi marka Rolex, buki banko i mas pertenensia dje famia. Despues di esei e tiponan a bati retirá na pia, meskos ku nan a bai na e kas. Sigur ku den bisindario, e "get away Car" lo tabata warda nan.

Mas den oranan di mainta ayera tambe tabatin mas kaso di atrako. Tabatin unu den e bario di Bottelier, Jongbloed, kaminda a bai ku outo di un hòmber i tambe a kita sèn for di dje.
Tambe un "bode" di un negoshi riba Gosieweg a keda atraká, kaminda nan a bai ku 800 florin. Den e kaso aki, a dal den outo dje "bode", i ora esaki a baha, a eksigí di dje p'e entrega tur loke e tin na plaka. Despues di esaki e atrakadónan a subi un outo kòrá manehá pa un hende muhé.
Tur e kasonan aki huntu ku esnan ku ya kaba e tim di atrako tin, ta investigando.