E SIMAN AKI MES TIN DESISHON RIBA GASOLIN, AWA I KORIENTE

WILLEMSTAD,- E siman aki mes lo tin desishon riba preis di gasolin i otro produktonan di Curoil, miéntras ku desaroyo den preis di awa i koriente tambe lo ta kla den e dianan aki, asina EXTRA a komprondé di e diputado enkargá ku ta Eugene Rhuggenaath i Humphrey Davelaar.

EXTRA ta komprondé ku lo tin un reunion ekstraordinario di BC pa atendé ku e asuntu aki.

Konforme último desishon di Bestuurscollege ta hasi adaptashon di preisnan di produktonan derivá di petroli segun merkado. Último simannan tin hopi spekulashon kiko lo pasa ku preis di gasolin, diesel i e otro produktonan ku Curoil ta bende riba merkado, miéntras ku tin bastante pregunta kon ta para ku tarifa di awa i koriente.

Den kòmbersashon ku diputado Rhuggenaath el a duna di konosé ku pa loke ta trata e tarifa di awa i koriente ta asina ku te na último momentu ainda mester a risibí informashon di Aqualectra. Asta ta asina ku no por a finalisá e konseho di Dienst Economische Zaken (DEZ) pa e motibu ei. Sr. Rhuggenaath a indiká ku su kolega diputado Davelaar tabata den eksterior pa un biahe di trabou i e diputado a pidi pa lag'é yega bèk pa e wak tur e konsehonan tur huntu, esta esun pa preis di gasolin i otro produktonan i tambe esun di awa i koriente.

Sr. Davelaar ke studia esakinan promé ku e hasi un proposishon konkreto na Bestuurscollege. Rhuggenaath a splika ku ora e haña e konsehonan di DEZ e ta manda esaki pa e diputado konserní, ku den e kaso aki ta sr. Davelaar. Diputado Rhuggenaath a sigui splika ku e siman aki mes e ta kere ku lo tin desishon final pasobra e konsehonan tei, i asta e ‘beschikking' tambe ta kla, ke men ta Bestuurscollege mester akordá kua preis e ta bai di akuerdo kuné.

Diputado Davelaar kende tambe EXTRA a papia kuné a splika ku e no a haña e konsehonan na tempu. Ta dia 29 último el a komprondé ku e konsehonan a drenta, pues e mester tuma tempu pa tuma nota di esakinan. Pa loke ta trata su biahe, e diputado a splika EXTRA ku su biahe di trabou tabata planiá for di óktober 2008, pues no ta algu ku awor a subi mesa, ademas ta konosí ku e ta para pa su responsabilidat.

Diputado Davelaar a enfatisá ku e siman aki mes lo trata tur dos, esta esun di preis di produktonan di Curoil i tambe tarifa di awa ku koriente. Gobièrnu tin e posibilidat pa den e promé siman di luna hasi e kambionan konforme preis di merkado, pues no ta asina ku si no hasi e adaptashon entrante promé di luna ku mester warda te e siguiente luna.

Pa loke ta trata esun di Aqualectra el a bisa ku ta for di un prinsipio a bisa ku na kuminsamentu di febrüari lo hasi e adaptashon.

E diputado a bisa ku e informashon ku e tin te na e momentunan aki ta ku preis di gasolin mester baha un poko mas, miéntras ku konforme merkado preis di diesel i gas si lo mester un tiki. E produktonan ku mester bai pa Aqualectra tin algun ku mester baha i otro ku mester subi, pero e subida lo ta hopi chikí.