MONEDA NOBO PA KORSOU I ST MAARTEN

WILLEMSTAD.- Despues di un dia largu pero ku oranan di reunion masha kòrtiku, e deliberashonnan polítiko a logra terminá ayera nochi kasi mitar di 12 pa asina por a firma i asina yega un tiki mas serka di e final di Antia i pa nos bai próksimamente na pais Kòrsou i St. Maarten.

Un dia históriko ku e punto mas fèrfelu ku mester a keda atendé ku ta e kuerpo polisial komun, esta e Gezamenlijk Voorziening Politie.
Esei tabata e punto ku mas a deliberá riba dje, prinsipalmente e sindikatonan tabatin interogatorio riba kon e lei a wòrdu skibí. Tabatin akuerdo kaba den e lei di konsenso pa polis pero kon e lei a wòrdu skibí finalmente tabatin basta interogatorio riba dje.

Kuerpo polisial komun

Un di e problemanan sigur tabata bou di ken su responsabilidat e direktor di e GVP lo bai kai i si e ta haña su mes personal si òf no. Despues di firmamentu a bin dilanti ku e direktor di e GVP ta bai kai bou di e hefe di e kuerpo, e minister di Kòrsou, esun di St. Maarten i esun di Hulanda. Esun hulandes ta atendé e asuntunan polisial pa islanan BES.

Tambe a yega na akuerdo riba e lei di konsenso di supervishon finansiero pa Kòrsou i St. Maarten despues di ta pais den reino. I den e akuerdo ei a yega na palabrashonnan final tambe riba saneamentu di debe i kon e saneamentu ta bai tuma lugá.
E base ta ku Hulanda ta bai paga mas di 3.1 miar florin na debenan di Antia. Tambe ta bai bini kasi 483 mion pa ‘betalingsachterstand'.

Lo sanea 100% di ‘aflossing' i 70% di interes durante di e periodo di transishon 3. Hulanda despues di transishon lo tuma e resto di e debe di tantu gobièrnu sentral komo Kòrsou, i despues lo ‘verreken' ku Kòrsou.
E sènnan ei lo bini liber for di den desèmber mes, i asina por kuminsá paga e debenan atrasá.

Banko sentral

Tin akuerdo tambe riba Banko Sentral. Kòrsou i St. Maarten a yega na akuerdo pa un Banko Sentral komun. E hunta di komisario lo konsistí di 3 miembro di Kòrsou, 3 di St. Maarten i un presidente. Bùrt pa bùrt Kòrsou i St. Maarten kada dos aña lo elihí un presidente komisario nobo.
Den e parti di maneho di e banko ta konsistí di 3 direktor i e filial na St Maarten ta bai kambia den unu kompleto esta ku su mes direktor.

Moneda nobo

Relashoná ku Banko Sentral tambe lo bai bini un moneda nobo i tentativamente a menshoná e nòmber di Dutch Caribbean Guilder/ Florin. E moneda nobo aki ta mará na dòler meskos ku e florin antiano aktual.
A yega na akuerdonan riba e proseduranan pa e komishon ku ta bai ‘toets' leinan orgániko i konstitushon nobo durante di e Konferensha di Mesa Rondó dia 15 di desèmber próksimo. Tin un rapòrt kaba pero esei no a keda atendé ainda pa partidonan.

Repartishon di bienes

Mas aleu a akordá e repartishon di bienes i a bai di akuerdo pa Kòrsou haña 73.2%, St. Maarten 18.8%, Boneiru 5.8%, Statia 1.5% i Saba 0.7%.
Loke si no ta kai eiden ta Apna, SVB i Banko Sentral i pa nan mester bini un lei apart.

Reunion eksitoso

Ku esaki, no solamente Kòrsou por wak bèk riba un reunion eksitoso, pero tambe Kòrsou por wak dilanti na un posishon basta konvinsente durante di e reunion di Mesa Rondó di dia 15 di desèmber próksimo, pa loke ta e materia finansiero/ekonómiko. Esaki ta otro stap mas importante den e trayekto pa Kòrsou alkansá su status di Pais den Reino. Koalishon ta sumamente kontentu ku e logro aki, i ta rekonosé e ròl importantísimo ku konseheronan di tantu den e aparato gubernamental, komo eksterno a hunga den esaki. Mike Willem komo diputado finansiero pa Kòrsou ta manda un palabra grandi di gradisimentu i elogio na nan, pero tambe na e representantenan di Vaste Commissie di Eilandsraad i di Overlegplatform