WILLEMSTAD.- Ekonomia di Kòrsou a konosé un kresementu di 2.2 porshento aña pasá.

Esei ta ménos ku e 3.5 porshento di aña 2007 i defakto ménos di loke tabata e pronóstikonan. Asina CBS a informá e siman aki den su presentashon na aktornan den ekonomia. Ta kalkulá ku e kresementu pa 2009 lo ta aun ménos. Banko Sentral ta kere ku Antia den su totalidat lo konosé un kresementu di 1 porshento e aña aki teniendo kuenta ku e desaroyonan mundial.


T'asina ku desempleo a baha pa di tres aña konsekutivo. E konfiansa den futuro ta keda haltu miéntras ku e perspektivanan pa 2009 ta moderadamente positivo. Esei ta e konklushonnan ku por saka for di sifranan relashoná ku e desaroyonan ekonómiko resien presentá pa CBS. E Produkto Bruto Interno di 2008 ta di 5.080 mion florin kompará ku 4.666 di 2007.


E kresementu ménos fuerte tin di haber ku e.o. e bahada den aktividatnan industrial, un kresementu retrasá den komersio i un subida general den preis. Na 2008 preisnan a subi ku 6.9 porshento, loke tabata e porsentahe di mas haltu den e último 20 aña.
Pa motibu dje ekonomia habrí di Kòrsou, desaroyonan mundial tabatin influensha grandi riba desaroyonan lokal. Por sierto, desaroyonan den ekonomianan di nos partnernan mas importante den negoshi, ku ta Merka, Hulanda i Venezuela ta hunga un ròl den esaki.

 

Serka nan tur tabatin kuestion di ménos kresementu na 2008 kompará ku e aña anterior.
Durante e presentashon di ayera tardi den ouditorio di Banko Sentral drs. Alberto Romero a duna un splikashon tambe di loke a sosodé i ta sosodiendo riba merkado internashonal. Tin un reseshon ekonómiko ku a kuminsá for di fin di 2007. N'e momentunan aki por konstatá ku kos ta mehorando. Pa paisnan manera esun di nos, kos lo drecha mas lihé i por kuminsá mir'é den di dos mitar di aña. Pero paisnan riku lo konstatá esei na prinsipio di aña 2010.


Pa loke ta e situashon aktual i e perspektivanan pa 2009, el a splika ku den aspektonan general nos lo bai tin un ekonomia mas slow den kresementu, ku un kresementu di 1% debí na ménos aktividat doméstiko kousá dor di desaroyonan den ekonomia mundial. Ademas lo tin un inflashon mas abou di 2.1% kousá pa redukshon den preisnan di komodidat global.
Un otro aspekto ta e saniamentu di debe, ku a start na febrüari 2009 (pa Kòrsou na mei 2009).

 

Print this article RSS Feed

If you liked this post you can: Print this article and subscribe to our RSS feed

Comments

  • Be the first to comment, please use the form below.

0.9793 // 49