TARIFA PRODUKTONAN PETROLERO PA AQUALECTRA TA BAHA BASTANTE

WILLEMSTAD,- Bestuurscollege a tuma desishon pa loke ta trata adaptashon di tarifanan di produktonan petrolero.

Gasolin ta baha mas o ménos ku 1 sèn, miéntras ku diesel si ta baha bastante ku 7%. E bahada mas grandi ta pa tur e produktonan ku Curoil ta bende ku Aqualectra pa produkshon di awa i koriente. Diputado Humphrey Davelaar enkargá ku e kolòm di energia a konfirmá e informashon aki pa EXTRA bisando ku e adaptashonnan ta drenta na vigor e siman aki, entrante aprel awor.
E bia aki si tur kos ta bon na tempu pa loke ta trata e desishon pa adaptashon di tarifanan di produktonan petrolero. Manera palabrá e preisnan nobo aki ta drenta na vigor dia 2 di aprel, asina diputado Davelaar a duna di konosé.

E tarifanan ta bira lo siguiente gasolin 92 ta baha ku ménos ku 1% i e preis nobo ta bira 161,20 sèn i gasolin 95 tambe ta baha ku ménos ku 1% i ta bira 164,70 sèn pa liter. Den e grupo gasoil ta esun ku ta baha mas tantu, esta ku 7% i ta bira 69,70 sèn pa liter. Kerosin ta bira 65,60 sèn pa liter i gas pa kushiná tambe ta konosé kambio.
Den e kaso aki gas di 100 liber, esta e bòter grandi ta baha i su preis ta bira Fl 43,90 i e bòter di gas chikí di 20 liber si ta subi un tiki i e ta bira Fl 10,60.
Diputado Davelaar ta kontentu di anunsiá ku e tarifa di tur e produktonan ku ta bai Curoil a baha bastante. E preis di Industrial Fuel Oil (IFO) ta bira Fl 456,--, e gasoil pa Aqualectra ta bira Fl 494,-- i e diesel tambe pa Aqualectra ta bira Fl 555,--.

Pues ta diesel pa outonan i produktonan pa Aqualectra ta esnan ku a baha mas tantu e bia aki.
Pa medio di aprel awor ta spera un proposishon di Aqualectra pa loke ta trata adaptashon di tarifa di awa i koriente pa komunidat.
Riba esaki EXTRA a papia ku presidente direktor interino di Aqualectra sr. Anthon Casperson kende a bisa ku e siman aki nan ta spera di haña tur informashon di Bestuurscollege i despues di esei nan por hasi nan kalkulashonnan. Casperson a duna di konosé ku e embergadura di kalkulashon di nan tarifanan ta mas kompleho, pero nan ta spera di keda kla basta lihé. Asina tin tur informashon gobièrnu tambe lo haña proposishon di Aqualectra sr. Casperson a bisa EXTRA.