Tur kos ta kla pa konferensha di mesa rondó

WILLEMSTAD.- Awor ku a fiha e legislashon polisial i e legislashon pa supervishon finansiero den e relashonnan nobo den Reino, nada no por stroba un eksitoso Konferensha di Mesa Rondó dia 15 di desèmber 2008.

Esei ta prinsipal resultado ku sekretario di estado Bijleveld (Relashonnan di Reino) a logra djaweps, dia 26 di novèmber, ku mandatarionan di Antianan Hulandes, Kòrsou i Sint-Maarten durante un konsulta polítiko na Philipsburg (Sint-Maarten). Ku e Konferensha di Mesa Rondó dia 15 di desèmber Reino ta pará na bispu di kambionan grandi i históriko.

Resultado di e Konferensha di Mesa Rondó benidero lo ta un base pa un Reino nobo ku ta konsistí di kuater pais i tres "bijzondere gemeenten" di Hulanda den Caribe. Tur legislashon nesesario ta kla i awor ta riba mesa pa evaluá nan.
Den e steering commitee polítiko a fiha e legislashon polisial ku lo ta na vigor pa e relashonnan estatal nobo.

Punto di salida di e legislashon polisial nobo ta un organisashon polisial di kalidat haltu i íntegro. Na momento ku Kòrsou i Sint-Maarten bira pais den Reino nan ta haña kada unu su propio kuerpo polisial. Boneiru, Saba i Sint-Eustatius, konhuntamente, ta haña un kuerpo polisial na momento ku e islanan akí bira un "bijzondere gemeente" di Hulanda.

E tres kuerponan den e parti karibense di Reino lo kooperá ku otro, di moda ku miembronan di e tres kuerponan polisial lo ta kualifiká pa aktua na tur e islanan. Lo bini ademas un previshon konhunto den kua e kuerponan lo kooperá ku otro den e lucha kontra kriminalidat organisá i kriminalidat ku ta atravesá frontera i tambe den kaso di sosten operashonal.

Na Kòrsou i Sint-Maarten mantenshon di órden públiko i seguridat, i dunamentu di asistensia ta kai bou di outoridat di e respektivo ministernan di Hustisia di e paisnan nobo. Na Boneiru, Saba i Sint-Eustatius (Islanan BES) e minister hulandes di Asuntunan di Interior i Relashonnan di Reino i e minister hulandes di Hustisia ta responsabel pa e aspektonan ya menshoná.

Fakultat di investigashon den asuntunan penal i di persekushon hudisial ta kai bou di outoridat di prokurador general.
Pa agentenan polisial por aktua na tur isla a yega tambe na akuerdo riba ekipo, instrukshon pa uso di violensia i riba sistema di rango. A yega tambe na akuerdo tokante interkambio di datonan polisial. E organisashonnan polisial nobo lo hiba un maneho aktivo di integridat, ku lo ta dirigí riba aktuashon korekto, prevenshon di abuso di kompetensia, konflikto di interes i diskriminashon. Lo introdusí un sorto di reshèrshi di Reino pa investigá integridat.
Tambe a fiha e legislashon ku ta regla supervishon di finansa públiko di e paisnan nobo Kòrsou i Sint-Maarten. Pronto e Kolegio di Supervishon Finansiero (CFT), ku na e momento akí ta ehersé supervishon di finansa públiko di Boneiru, Saba i Sint-Eustatius, lo bai hasi esei tambe pa e Pais Antianan Hulandes i e Islanan di Kòrsou i Sint-Maarten. E teksto di lei ku a akordá na e konsulta ta regla e supervishon den e situashon nobo.
Punto di salida pa e supervishon ta: ekilibrio presupuestario i un límite pa hasi debe. E supervisor lo supervisá tambe e manera riba kua e paisnan nobo ta anda ku empresanan di gobièrnu, manera den kaso di nombramentu. Ademas a yega na akuerdo tokante un (1) banko sentral pa e paisnan nobo Kòrsou i Sint-Maarten. Na e konsulta polítiko a fiha embergadura di e saneamentu di debe i e forma ku lo ehekutá esaki.