Alumnonan di unicollege ta opiná



Unicollege tur hende na Boneiru konosé kaba komo e skol kaminda nan a introdusí e sistema di ‘natuurlijk leren’, es desir ‘siña na un manera natural’. Kon esei ta bai? Wél, kasi tur e ‘leerstof’ (e lokual ku e muchanan tin ku siña pa lei) ta wòrdu ofresé na e alumnonan den forma di ‘proyekto’. E proyektonan aki ta profundisá riba sierto temanan, ku ta wòrdu spliká for di punto di bista di tur e vaknan ku e muchanan tin ku siña, pero integralmente (es desir tur e vaknan tin nan lugá den e proyektonan).

Proyektonan
E kos bon di e proyektonan aki ta ku e alumnonan mes mester deskubrí e ‘leerstof’
trahando riba e proyektonan. Naturalmente tin guia di dosentenan tambe, pero na promé instansia nan mes tin ku hasi esfuerso. Di e forma aki nan ta komprondé e ‘leerstof’ mas mihó, mientras ku nan ta desaroyá nan propio kreatividat. Ademas, e sistema di enseñansa aki ta siña e alumonan koperá ku otro, pa motibu ku ta traha riba e proyektonan den grupo. Sin embargo, kada alumno tin ku traha riba su mes tambe, di moda ku e resultado ta un bon balansa entre koperashon i individualidat.

Refleho di bida real
Otro bentahanan ta ku e proyektonan ta mustra kon e diferente vaknan ta integrá
den otro, no separá manera na skolnan konvenshonal. Asina e proyektonan ta reflehá realidat di bida mihó. Esaki, huntu ku e hecho ku pa ‘natuurlijk leren’ e muchanan mes mester ta hopi mas aktivo, ta pone ku nos tin na Boneiru un skol úniko ku nos ta rekomendá plenamente i di kurason. Naturalmente den bida nada
no ta eksistí ku tin bentaha so. Semper tin desbentaha, pero segun nos e desbentahanan ta tiki (realmente nos mes no sa niun, pero ku tempu algun lo sali), anto e bentahanan ta hopi. P’esei Boneiru por ta hopi kontentu ku e skol aki. Lo ta bon si gobièrnu tuma bon nota di lokual e skol aki ta hasiendo i duna nan tur asistensia posibel, inkluso supsidio.

Ambiente positivo
Ora bo ta bishitá e skol aki, bo ta sinti mes ora ku e alumnonan ta aktivo, kontentu i sigur di nan mes. Anto no tin problema grave manera na SGB, kaminda nan asta
mester hür bewaker pa mantené òrdu. Pa futuro di Boneiru nos mester di inisiativa
manera Unicollege. Anto no kere ku Unicollege ta un skol elitario, kaminda solamente yu di e rikunanta haña un chèns. Bèrdat ta ku e skol ta kobra basta un tiki ‘schoolgeld’, pero pa medio di beka pa alumnonan di ménos rekurso Unicollege a logra di ofresé enseñansa na tur mucha, di tur klase di nos sosiedat.

Kiko alumnonan mes ta bisa?
ARCO a papia ku 3 alumno di UNICOLLEGE, e skol úniko pa HAVO/VWO na Boneiru: Kjelld Kroon, Nathan Croes i Zahid Frans. Resúmen di nan komentarioi eksperenshanan ta sigui akibou. Nos ta kuminsá ku Kjelld Kroon.

Kjelld Kroon
Kjelld kier bira dòkter. Pues e ora ei e tin ku bai VWO. Na Unicollege esei ta posibel,
pero promé aña ainda ta HAVO/VWO kombiná. Despues ta disidí kende ta bai bai HAVO òf VWO.

Kjelld a konta nos ku e skol tin un website speshal, kaminda e alumnonan ta haña
tur e informashon (inkluso ‘leerstof’) ku nan mester. Pues for di kuminsamentu e alumnonan ta traha ku computer intensivamente.

Na e website e alumnonan ta haña e proyektonan ku nan tin ku traha riba dje. Mayoria di nan mester wòrdu ehekutá den grupo. Tin biaha tin ‘opdracht’ individual
tambe. Na fi nal di un proyekto e alumnonan mester presentá na otro kiko nan a siña. Esaki por bai den form di un splikashon bokal, pa medio di un poster, òf un
presentashon di Power Point (atrobe e computer ta hunga un papel importante).

Lesa buki
E aña eskolar ta partí den 4 periode, anto kada periode mester lesa un buki, normalmente na Hulandes. E alumno mes por skohe, pero mester ta bukinan poko serio sí. Kjelld ta gusta lesa buki di suspenso, manera ‘Kippevel’, pero tambe otronan. Na final mester traha un ‘boekverslag’ (resúmen plùs opinion) di e buki.

Lès ta na Hulandes òf na otro idioma, p.e. Ingles, Franses òf Aleman. No tin Spañó. E proyektonan mes tambe por ta na otro idioma, anto asina - trahando riba e proyektonan - di mes e alumnonan ta siña e idiomanan tambe. Kjelld no tin problema ku Hulandes, pasobra el a nase na Hulanda, anto a yega Boneiru na aña 2006.

Kjelld ta gusta e skol. ‘E ta diferente’, e ta bisa. Na Unicollege bo no ta kambia klas etc. i tin ménos alumno. Kjelld ta haña UNICOLLEGE mas dushi ku su skol na Hulanda, pasobra aki ta mas rustig, no tin bochincha, no tin mucha ku ta kansa bo kabes kada ratu, pasobra tur hende ta bezig ku su trabou.

Koperashon
Por último Kjelld ta komentá riba koperashon. E ta atmití ku no ta fásil tur ora, pasobra tin biaha kisas otro alumno no ta komprondé bo dje bon. E por ta difísil,
pero bo mester siñ’é, sino bo no por kaba ku bo trabou, anto e ora ei bo ta haña
‘onvoldoende’. Kjelld a komprondé esei, anto te ainda el a haña bon cijfer so. ARCO ta deseá Kjelld tur klase di éksito, anto nos no tin duda ku aki 13 aña n’ei nos tur por akudí serka Dr. Kjelld Kroon, ora nos ta sufri di kualkier malesa òf tabata víktima di kualkier aksidente.

Nathan Croes
Nathan Croes ta di Aruba. Na momentu ku e ARCO aki ta sali riba merkado, e lo tin
16 aña di edat. El a yega Boneiru un aña i mei pasá, anto pa e motibu ei e mester a ripití 2de leerjaar. Awor e ta den 3de. Na kas e ta papia mas tantu Papiamentu, pero un tiki Ingles tambe ku su padraso. Nathan ta splika ku UNICOLLEGE ta hopi diferente di Colegio Arubano, kaminda el a pasa 1ste klas.

Riba nos pregunta kua sistema e ta preferá, e ta kontestá ku tur manera tin su kos bon i su kos malu. Pero e ta atmití ku na Colegio Arubano e lèsnan tabata hopi laf. Na UNICOLLEGE e lèsnan ta interesante, pasobra bo mes ta deskubrí e kosnan importante. Un desbentaha, segun Nathan, ta ku e sistema di UNICOLLEGE ta dependé totalmente di internet. Ora internet ta kai afó, bo no por traha mas.

Koperashon
Meskos ku Kjelld, Nathan ta indiká ku dor ku bo ta traha den grupo, bo ta siña koperá ku otro. Nos a puntrele si ta surgi pleitu, anto Nathan a kontestá ku nò. Tin
diskushon sí, pero pleitu real nò. Por último Nathan a splika nos ku na UNICOLLEGE ta usa 2 sistema pa tèst si e alumno a komprondé e leerstof bon. Sea e alumno ta duna un presentashon, òf e tin ku hasi un proefwerk.

Nathan a indiká ku e kier bira un business manager, preferiblemente di su mes kompania, algu den komersio. Dor ku e tin un mente independiente, e no ta mira su mes traha den servisio pa kompania di otro hende. ARCO ta deseá Nathan tur klase di éksito komo direktor di su propio kompania!

Zahid Frans
Zahid Frans a nase na Kòrsou, pero realmente e ta di Boneiru. Pa motibunan médiko su mama a bai Kòrsou pa e parto, pero Zahid nunka no a biba na Kòrsou. E
ta Boneriano puro. E tin 14 aña di edat i ta alumno den 2de leerjaar naUNICOLLEGE. Riba nos pregunta di kon e ta gusta su skol, el a kontestá ku e ta mir’é komo un eksperensha nobo. Bo ta siña i traha na un manera diferente. Bo ta siña ku computer. Segun Zahid, bo ta siña mihó ku na SGB.

Proyektonan
Zahid ta splika ku e ‘temanan’ (proyektonan) tin tur kos integrá, no apart manera na SGB. Segun Zahid, as ina bo ta haña mas atenshon pa e diferente vaknan, pasobra bo semper tin ku mira nan den un konteksto mas amplio, manera den bida real.

Zahid ta papia Papiamentu na kas. Den kuminsamentu el a haña Hulandes difísil, pasobra den klas mester papia Hulandes ku otro, anto tur e temanan na computer tambe ta na Hulandes. Pero ya kaba el a kustumá i e no tin problema mas.

Zahid tambe ta siña Ingles i Franses. E ta haña e aksènt di Franses difísil. Dor ku bo nunka no ta tende Franses riba kaya di Boneiru, e no ta hañ’é fásil. Pero e ta logra tòg.

Koperashon
Atrobe e tema di koperashon a bin dilanti. Meskos ku pa Kjelld i Nathan, koperashon no tabata fásil pa Zahid den kuminsamentu. E semper a siñá su so, anto awor e mester a traha den grupo. Tin biaha a surgi clash ku otro alumnonan. Zahid ta siña rápido, anto tin biaha e tin ku warda riba e otronan. Esei ta frustrante. Pero el a siña i awor tur kos ta bai bon. Overigens no tur kos ta bai den grupo tampoko, pues tin diferente kos ku kada alumno tin ku siña individualmente. Tin balansa.

Portfolio
Otro kos notabel ta e evaluashon di kada alumno su ‘portfolio’ (= un file ku resultado di tur e toets-nan i presentashonnan di kada alumno). E alumno mes tin ku splika su mayornan (den presensia di e dosentenan) di kon el a haña sierto cijfer, sea ta voldoende òf onvoldoende. Di e forma aki e alumno ta duna kuenta i razon di su forma di traha na su mayornan, loke ta ‘konsentrá su mente’ sin duda.
Zahid tambe kier bira business manager i lanta su propio kompania. Kisas algu
den salubridat òf un hotèl. Di nos kombersashon nos por a nota ku Zahid tin un
mente hopi skèrpi i rápido. No tin duda ku e lo yega hopi leu den bida. ARCO ta
deseá Zahid tur klase di éksito.