“Estado” ta interaktuá ku sosiedat di diferente manera:
E ta kobra impuesto i tin di usa esakinan na benefisio di e sosiedat;
E ta registrá hende, entre otro den registro sivil;
E ta otorgá dokumento i pèrmit;
E ta atministrá hustisia;
E ta vigilá seguridat i órden;
E ta apliká straf i but;
Te sierto grado e ta regulá merkado i preis;
I hopi otro funshon.
Den kada un di e aktonan ei, un òf vários organismo di gobièrnu ta interaktuá ku e siudadano, en general, for di un posishon kaminda e entidat gubernamental tin un posishon di dominio. Esaki ta asta konta den e situashon ku bo ta paga belasting òf ta hasiendo un donashon na un entidat públiko. Sa sosodé ku e siudadano sa pasa den prosedimentunan manera ta “Estado” ta hasiendo e siudadano (ku ta esun ku ta aportando) un fabor!
Kos sa yega dje leu ei ku despues di pèrdè mitar dia den un rei, e kontribuyente ku a paga su belasting tin di asta gradisí e kahero i no e inverso!
Ku tempu, na hopi pais e funshona-rio di identidatnan públiko (inkluso NV-nan di Gobièrnu) a atkerí un aktitut di superioridat, defensivo i agresivo pareu.
Tin ámtenar tin e prehuisio ku tur siudadano ta un pekadó, òf un potensial pekadó kontra lei, i p’esei mester trata nan ku deskonfiansa. Tanten ku no prueba otro no ta trata nan otro.
Pa kolmo, den mayoria di relashon di poder, pa no tin kibukashon den repartishon di bienes públiko tin prosedura “speshal” pa esnan bon akomodá. Pa duna un ehèmpel bon konosí: te ku un par di aña pasá ora bo bin ripará un par di dia promé ku biaha ku bo pasport a vense, si bo tabatin un landsman, bo tabata bin kla pa haña bo pasport, via un prosedura rápido pafó di e sirkuito normal.
E relashon muchu mas direkto ku Hulanda pa loke ta finansas
Drentando e relashon nobo entre siudadanonan di islanan B.E.S. i e entidat muchu mas grandi ku ta Hulanda, tantu e siudadano di e islanan B.E.S. komo Hulanda mester paga bon tinu pa e rèspèt pa ku e siudadano sigui progresá den un espíritu demokrátiko riba nivel lokal. Esaki, ni maske e islanan B.E.S. ta bai tin un relashon muchu mas direkto ku Hulanda, ku ta un identidat muchu mas grandi ku awor ta e kaso ku gobièrnu di Antia.
Rèspèt pa e siudadano i su derechonan demokrátiko riba nivel lokal mester keda un preokupashon konstante di tur gobièrnu inkluso e gobièrnu i e ámtenarnan di Hulanda ku tin di interaktuá ku e islanan B.E.S.
Ta bin diferente kambio, aworakí, esun mas visibel ta riba fi nansas públiko.
Riba esaki ta bon pa establesé públiko i transparente e reglanan estrikto pa funshonarionan públiko. Mas ku tur esaki ta konta pa e “College Financieel Toezicht” ku ta algu nobo pa e siudadanonan di e islanan B.E.S., sigur den un situashon kaminda den komienso e gobièrnunan lokal mester bai siña goberná den presupuestonan sin défi sit.
Riba tèrmino medio (3 pa 4 aña) e gobièrnunan lokal mester mustra via kampañanan públiko general ku e kolegio aki ta operá den un herante demokrátiko lokal kaminda e siudadano tin sierto poder i ku e Supervishon
ta netamente pa salbaguardiá interes di e siudadano lokal na nòmber di Reino.
Deseabel ta ku informashon riba kosnan públiko tin di yega na mayoria di
hende posibel, si por via oudiensianan públiko (e oudiensia ku señora Bijleveld
riba e islanan B.E.S. tabata un bon komienso) i por ehèmpel, den transkurso di tempu, introdusí un presupuesto partisipativo.
En general den e aparato públiko mester sigui kultivá un kultura di servisio, di tal manera ku ta solamente den forma okashonal mester hasi uso di e reglanan pa mustra e ámtenar riba su debernan pa ku e pueblo ku e tin di sirbi.
Al final e kolegio di supervishon finansiero tambe mester radia e deber síviko aki pa ku e pueblo ku e ta sirbi, ku ta e Boneriano, e Stasiano i Sabano, ku ta forma parti integral di Reino. Pa ku e siudadano di islanan BES, ku ta kere den un sistema demokrátiko, é tin di inkorporá interes públiko komo si fuera ku esaki ta su interes partikular