Ratu ratu ora kos pèrta, nos ta tende den nos pueblo e grito: “Mihó nos skohe pa independensia” manera si fuera e kos ei ta algu ku bo ta bai supermèrkado bai kumpra òf yama na telefòn nan ta entreg’é. Asta gas ta dura seis siman òf mas pa nan entregá.
Ta bon pa nos para ketu i realisá ku Independensia ta un proseso ku ta dura mas largu ku e bòter di gas. Ademas e no ta algu ku nan tin na stòk, ta nos mes mester bira sneiru i kuminsá kose nos flus. Ku kada be ora nos ta den pèrtá nos grita, esei no ta yuda nos ku nada. Al kontrario nos frustrashon ta bira mas grandi i un biaha mas nos ta sinti nos impotensia na lugá di realisá nos potensia i nos kurashi. E kaminda pa Independensia ta pasa via di e ruta di Interdependensia.
Ku otro palabra : Dependensia aktual â–ºInterdependensiaâ–ºIndependensia
Tur momentu ku nos haña oportunidat nos mester utilisá esei. Den e simannan ku ta tras di lomba nos tabatin un bon oportunidat pa fomentá nos interdependensia. Sin embargo Nos ta dje tantu enbolbí den nos mes dependensia ku nos no tin atenshon ni p’e oportunidatnan ku ta presentá.
Na Kòrsou, sin pidi sin puntra, dos hos a pasa ranka dak di kasi shen kas di nos kompatriotanan. E momentu ei nos a skucha radio, wak televishon, papia den e fin di siman ei riba e fenómeno i un ratu despues bida a sigui su rumbo. Fiestanan, diskordia rondó di karnaval, preparashon pa siman di kultura, ets. ets. Krus Kòrá, Banko Maduro, Darwin Gregg i un par di bon alma mas a saka man hasi algu.
Awor kon a para ku e hendenan ku a haña daño ? Nos a buska nan drechi òf nan robes ? Kiko a para di nan ? Tur hende ta “DRÙK”. Partido polítikonan, Iglesianan, Kompanianan komersial, Sindikatonan, Kompanianan den konstrukshon, Gruponan Sosial, Kultural i Deportivo, Kámara di Komersio, VBC, tur ta okupá ku NAN asuntunan den NAN dependensia di tur dia. Mi ta tende kaba e pregunta: “Ta kiko bo ta maha atrobe. Kada hende atendé su mes asuntu hòmber !” “Kada ken pa su mes, DIOS pa nos tur ! ” T’asina nos ta bira independiente ? ” Den kuadro di nos siman di kultura ta bon pa nos reflehá un ratu i realisá ku e aktitut di nos un yuda otro semper tabata un parti valioso di nos kultura.
Ainda nos tin oportunidat pa saka man i yuda nos ruman. Tin hopi kas ku te ainda ta destruí i famianan desampará sin pariba ni pabou. Ban lanta kara biba nos kultura i logra asina nos interdependensia !
George Benjamin Curiel