PRINSIPIONAN DI GUIA SPIRITUAL
- Tras di Kreashon i tur balornan universal – manera Hustisia i Amor – tin un Prinsipio Spiritual. Sin Bèrdat no por tin Hustisia i sin Amor no por tin Union. Hustisia, Bèrdat, Amor i Union t’e metanan mas elevá pa hende aspirá na dje.
- E Prinsipio Spiritual t’e base di tur religion i hende sa usa diferente nòmber pa deskribiele, manera Dios, Allah, Yehovah, Brahman etc.
- E proporshon entre Naturalesa i e Ser Humano ta igual na e proporshon entre e Ser Humano i Dios.
- Dios ta mas ku e total di su partinan (prinsipio di holismo).
- E libertat mas haltu t’e boluntat spiritual. Esaki ta un eskoho individual (libertat di konsenshi).
NORMA I BALORNAN
- E partido ta formulá su punto di bista tokante norma- i balornan relashoná ku temanan manera: matrimonio, aborto, eutanasia, homoseksualidat i uso / maneho di droga, i tambe tokante tekno-logianan nobo manera teknologia nuklear, (eu)genétika, robótika, informátika i nano-teknologia.
- E Ser Humano ta atkirí kada dia mas sabiduria. Responsabilidat pa bienestar di komunidat ta krese ku kresementu di sabiduria. Norma- i balornan ta evoluá ku kresementu di sabiduria, di moda ku e partido su punto di bista relashoná ku e temanan akiriba menshoná lo mester wòrdu reformulá de bes en kuando.
PRINSIPIONAN DI GUIA POLÍTIKO
- E partido ta inter-religioso, inter-nashonal i inter-rasial.
- E partido ta rekonosé i ta respetá e prinsipio di separashon entre Estado i Religion.
- Estado mester ta lo mas chikitu, lo mas transparente i lo mas responsabel posibel.
- Estado mester wòrdu guiá na un forma pragmátiko idealista.
- Solamente bon método por duna bon resultado. E meta no ta hustifiká e método.
- E Ser Humano ta sentral. Lo duna medio-ambiente i animalnan mas tantu konsiderashon posibel.
- Tur hende ta liber, ta di balor igual i tin derecho igual. Tur hende mester konsiderá i trata otro komo ruman.
- Sin interes públiko no por tin interes privá. Hende i pais ta interdependiente i interkonektá.
- Labor, dedikashon i paga debe kabalmente t’e basenan di un komunidat sano.
PRINSIPIONAN DI GUIA EKONÓMIKO
- Ekonomia ta distribushon hustu di abundansia, nò di skarsedat. Tin sufisiente pa un i tur.. Koperashon i sinergia t’e yabinan.
- E síntesis hustu entre kapi-talismo i soshalismo ta un kom-binashon sinergétiko di e mihó karakterístikanan di ambos sis-tema. Por yama e síntesis aki ‘solidarismo’.
- Ta abolí impuesto di ganansia; dividendo ta kai bou di impuesto di entrada.
PRINSIPIONAN DI GUIA HURÍDIKO
- Hustisia ta mas importante ku lei.
- Kada derecho humano ta enserá un responsabilidat humano.
ARCO ta konvensí ku ta apsolutamente nesesario awor pa lanta un partido polítiko nobo na Boneiru (i kisas tambe na Saba ku Statia). Sin embargo, siendo un revista komentarista, nos mes no por lanta i dirigí un partido. Otronan tin ku hasi esei. Loke nos sí por hasi ta formulá idea i stimulá otronan.
Si e ideanan den e artíkelo aki a lanta bo interes i si bo ta dispuesto pa bira leader òf miembro di un partido nobo, tuma kontakto ku nos redakshon. ARCO ta bai kompilá un lista di persona i organisashon ku ta dispuesto pa sostené un partido nobo.
E partidonan bèrdè i korá a dominá e ámbito di polítika na Boneiru asina tantu aña kaba, ku ta nada straño ku tin tantu korupshon. Nos no mester di un Hero Brinkman pa sa ku Boneiru tambe ta yen di korupshon. Oké, nos ta muchanan chikitu kompará vooral ku St. Maarten. I nos korupshon ta ‘suave’. Danki Dios. Pero nos tur sa ku tin mashá hopi abuso di poder.
Derechonan soshal i ekonómiko igual ku Hulanda
Pero korupshon no ta e úniko asuntu ku ta sklama pa un partido nobo. Ni UPB, ni PDB no a logra garantisá derechonan igual ku Hulanda. Pueblo ta bai sinti esei.
Nan ta sinti’é kaba, pasobra tur kos ta bira kada dia mas karu, pero sueldonan i AOV no ta subi.
Asina ku pueblo ta bira konsiente ku e statùs nobo no ta brinda mihó kondishonnan, UPB lo eksplotá. Pero PDB tambe ta moribundo, pasobra PDB a vota kòntra derecho igual! Pues PDB kier pa pueblo keda pober! Pueblo lo kapta esei.