Odio komo arma politiko



Tendensia lamentabel

Último añanan polítikonan i sierto “opinion leaders” via talkshows ta trata di kustumbrá nos ku odio ta un instrumento polítiko normal. Den esaki nan a logra parsialmente, pasobra tin sierto hende ta kana nan tras, “sobre-estimando” e influensia ku e rebeldia aki tin. Sin embargo, e úniko rebelion ku ta ser rekonosé (legalmente) den un demokrasia ta e rebelion na urna di elekshon.

Aki mi no ke bisa ku protesta i marcha no ta parti di e proseso demokrátiko. Todo lo kontrario. Asta den sierto kaso ta un nesesidat. Loke mi ke pone aksènt riba dje, ta e odio ku ta ser mesklá sútilmente i sistemátikamente den e ekspreshon di protesta pa esnan ku ta organisá e protestanan aki. Sigur último tempu.

Meskos ku un tèrmometer ta revelá eksaktamente kuantu kentura un pashènt tin, asina tambe e urna di elekshon ta mustra eksaktamente kuantu mayoria i kuantu minoria tin pa un ponensia òf un proseso, i ta legitimá esaki.

Ta doloroso di konstatá ku e rasgo skur i trágiko aki (esta di fomentá odio), den sierto modo a bin ta ser transmití den e servisionan di gobièrnu tambe, manera por ehèmpel, den enseñansa. Den enseñansa esaki ta hasiendo dañonan ireparabel, dor ku bo ta anda ku mucha ku ta den e proseso di ser formá komo un siudadano ku mester ta útil pa su mes i pa sosiedat.

E táktika di usa odio den polítika, ta konosí i usá histórikamente na kasi tur pais. E ta konsistí den identifiká un sektor soshal, ekonómiko òf polítiko di e poblashon (i den nos kaso spesífiko un òf mas di nos partnernan den Reino) i bisa ku ta nan ta kulpabel di tur e problemanan ku tin den e pais òf region.

Kulpabelnan apsoluto

E sektornan ei “E kulpabelnan Apsoluto” ta ser kambiá segun tópiko di e momento. Un biaha ta e oligarkanan (http://www.wisegeek.com/what-is-an-oligarchy.htm), otro biaha ta e neo-kolonialistanan Hulandes, otro biaha ta e pro-imperia-listanan, i esun na moda e dianan aki ta e migrantenan i entregadónan di nos patrimonio nashonal (bende patria) etc. etc.

I mirando kon e preis mundial di komes-tibel i kombustibel ta bayendo, lo tin ku odia esnan ku ta bende kuminda i kom-bustibel tambe. Den e “táktika di fomentá odio” mester sòru di rebahá e grupo ku ta ser di “target” te na kondishon di pária i e esnan “maldito” di nos bida na Kòrsou.

Ta kambia athetivo i ta kambia persona, pero loke no ta kambia den e “modus operandi” aki ta e agresividat i e menospresio. Loke ta persistente den tur kos ta e odio, i e opseshon pa dividí e Kurasoleño. Tin un persistensia di sembra deskordia soshal dor di, por ehèmpel, polarisá, papia mitar bèrdat i desprestigiá.

Lenguahe ofensivo

E polítika di e oposishon di awendia ta parse di ta kere ku e úniko kos ku e pueblo aki ta kontentu kuné ta lenguahe ofensivo, i ku e úniko manera ku nos komo pueblo por drumi na pas, ta ora nos a logra di identifiká sierto hende komo enemigunan ku ken ta imposibel rekonsiliá. Pa e polítikonan den oposishon di awen-dia, ta parse ku: semper mester prevalesé odio, semper tur kos tin di kaba den un rechaso frontal, semper mester tin dos banda separá, semper dos segmento di Kurasoleño mester konfrontá otro ku venenu di odio.

Ami ta kere ku sinséramente a yega e ora ku e polítiko i kualke Kurasoleño ku ta uza e táktikanan aki pa gana simpatia di pueblo, mester stòp ku e estilo aki.Simplemente pasobra e ta korumpí i rebahá nivel di nos bida síviko. Nos mester supstituí e lenguahe di insulto i bai den debate polítiko respetando otro.

Odio ta algu ku mester evitá “a toda costa”. E futuro di Kòrsou mester ta kada bes mas e fruta di un konbibensia fundá den aseptashon di e “otro” komo base i fundamentu di un Reino outéntikamente pluralista. Nos mester yega kaminda nos ta edifiká un Kòrsou i un Reino basá inekibo-kadamente den rèspèt profundo pa otro, sin supestimá otro i lansa insulto na otro.

Persona, no partido

Movementunan polítiko di último tempu ku a haña asiento den Eilandsraad no ta partido (ku eksepshon di Forsa Kòrsou) manera tradishonalmente nos konosé nan na Kòrsou. E partidonan ei, meskos ku esunnan di Rita Verdonk i Geert Wilders na Hulanda, ta pone ún persona sentral. Kontenido i ideanan ta ser redusí na un pamflèt di 5 pa 10 punto popular di e momentu ei.Un polítika di “ami” promé i despues e idea i otronan. E polítikonan aki no gusta e kuenta di struktura. Pa e polítiko di “ami promé” e kuenta di struktura ta “ballast”. Dor di konsentrá e partido rònt di un persona, kontenido i stabilidat ta sufri i tambe e poder di por goberná efektivamente. Pa kompensá un k’e otro, e polítikonan aki ta usa e arma di odio i ta fomentá deskordia soshal pa mantené nan mes den e kompetensia feros di polítika.Ban duna señal na e tipo di polítikonan i “opinion makers” ei na radio i televishon ku nos ke kontenido, no odio.